ახალგორელი სამოქალაქო აქტივისტისა და ჟურნალისტის, თამარ მეარაყიშვილის დაკავებას სახალხო დამცველი აფასებს, როგორც უკანონოდ თავისუფლების აღკვეთას, სამოქალაქო აქტივისტზე ზეწოლას და მისი გამოხატვის თავისუფლების შეზღუდვას:

"ეს დაკავება უნდა შეფასდეს, როგორც მისი იძულება სამუდამოდ დატოვოს ახალგორი. შემაშფოთებელია, რომ ე.წ. სამხრეთ ოსეთში სამოქალაქო აქტივისტებსა და არასამთავრობო ორგანიზაციებზე ზეწოლამ რეგულარული ხასიათი მიიღო".

სახალხო დამცველი მოუწოდებს დე ფაქტო ხელისუფლებას დაუყოვნებლის გაათავისუფლოს თამარ მეარაყიშვილი. ასევე, მოუწოდებს საქართველოს მთავრობას მიიღოს ყველა ზომა მისი უსაფრთხოების დასაცავად და გასათავისუფლებლად.

2017 წლის 16 აგვისტოს, ოკუპირებულ ახალგორში დააკავეს ადგილობრივი მკვიდრი, სამოქალაქო აქტივისტი თამარ მეარაყიშვილი, რომელიც ყოველთვის გამოირჩეოდა აქტიური სამოქალაქო პოზიციით და ახალგორის მკვიდრთა უფლებების დასაცავად გამოთქმული კრიტიკული მოსაზრებებით.

ნეტგაზეთთან საუბარში თამარ მეარაყიშვილის შვილი ჰყვება, რომ დღეს, 16 აგვისტოს მას სახლთან ახლოს დახვდნენ. სამოქალაქო ტანსაცმელში გამოწყობილმა პირებმა მას განუცხადეს, რომ დაკავებულია და ახალგორის პოლიციის შენობაში შეიყვანეს.

თამარ მეარაყიშვილი ნეტგაზეთის ფრილანსერი ჟურნალისტია. ის ფეისბუკის საკუთარ გვერდზე და რუსულენოვან გამოცემა ეხო კავკაზასთან, რესპონდენტის სტატუსით რაიონის პრობლემურ საკითხებზე, მათ შორის ხელმძღვანელ პირთა ქმედებებზე წერს. ის ახალგორის რაიონის სახელით ხშირად მონაწილეობს საერთაშორისო ორგანიზაციების მიერ კონფლიქტური რეგიონებისა და ამ საკითხებზე გამართულ კონფერენციებში, რომლებიც თბილისში ან საქართველოს ფარგლებს გარეთ ეწყობა.