26 ოქტომბერს, საარჩევნო უბნები 06:45 საათზე გაიხსნება, კენჭისყრა კი 08:00 საათზე დაიწყება.

09:00 საათიდან 19:00 საათამდე გადასატანი საარჩევნო ყუთის მეშვეობით კენჭისყრის პროცედურა წარიმართება. გადასატანი საარჩევნო ყუთი საარჩევნო უბანში არა უგვიანეს 20:00 საათისა უნდა დაბრუნდეს.

12:00 საათსა და 17:00 საათზე, საუბნო საარჩევნო კომისიის მდივანი ვალდებულია ამომრჩეველთა სიაში კენჭისყრის მონაწილე ამომრჩეველთა ხელმოწერების რაოდენობა გადათვალოს კენჭისყრის შენობები 20:00 საათზე დაიკეტება.

საოლქო საარჩევნო კომისიები ვალდებულნი არიან, კენჭისყრის დღიდან არაუგვიანეს მე-6 დღისა კენჭისყრის შედეგები ხელახლა გადათვალონ.

ცესკომ საპარლამენტო არჩევნების საბოლოო შედეგები 21 ნოემბრამდე უნდა გამოაცხადოს.

კენჭისყრის დღეს საავადმყოფოებსა და სხვა სტაციონარულ სამკურნალო დაწესებულებებში და ასევე, ძნელად მისადგომ ადგილებში შექმნილ საარჩევნო უბნებში საუბნო საარჩევნო კომისია კენჭისყრას დამთავრებულად აცხადებს 20:00 საათამდე ნებისმიერ დროს, თუ კენჭისყრაში მონაწილეობა ამომრჩეველთა სიაში შეყვანილმა ყველა ამომრჩეველმა მიიღო.

რა იკრძალება კენჭისყრის დღეს:

კენჭისყრის დღეს, საარჩევნო კოდექსის გათვალისწინებით, კენჭისყრის შენობაში წინასაარჩევნო აგიტაციაა აკრძალული. დაუშვებელია კენჭისყრის შენობის შესასვლელიდან 25 მეტრის მანძილზე სააგიტაციო მასალის განთავსება. აღნიშნული მასალა ჩამოხსნას, დემონტაჟსა და აღებას ექვემდებარება.

დაუშვებელია კენჭისყრის დღეს კენჭისყრის შენობაში ან კენჭისყრის შენობიდან 100 მეტრის მანძილზე ამომრჩევლის გადაადგილების ფიზიკურად შეფერხება. ასევე, დაუშვებელია კენჭისყრის შენობიდან 100 მეტრის მანძილზე ადამიანთა შეკრება ან ამომრჩეველთა აღრიცხვა.

აკრძალულია საუბნო საარჩევნო კომისიის წევრის გამოწვევა, საარჩევნო სუბიექტის მიერ მისი წარმომადგენლის გამოწვევა ან შეცვლა.

აკრძალულია კენჭისყრამდე 8 საათის განმავლობაში და კენჭისყრის დღის 20:00 საათამდე ტელევიზიისა და რადიოს ეთერში ფასიანი და უფასო წინასაარჩევნო რეკლამის, საარჩევნო სუბიექტების პროგრამების განთავსება და გადაცემა.

თუ გაინტერესებს 2024 წლის საპარლამენტო არჩევნებთან დაკავშირებული მნიშვნელოვანი სიახლეები გაწევრიანდით ჯგუფში — საპარლამენტო არჩევნები 2024.