რუსეთის პრეზიდენტის პრესსპიკერი, დიმიტრი პესკოვი აცხადებს, რომ რუსეთი არ ცდილობს და ნაკლებად სავარაუდოა, რომ გავლენა მოახდინოს მოლდოვასა და საქართველოში წინასაარჩევნო პროცესებზე.

"თქვენ იცით, რომ ჩვენ საერთოდ არ ვცდილობთ და არც მგონია, ამ ქვეყნებში სიტუაციის განვითარებაზე, საარჩევნო პროცესებზე გავლენის მოხდენის შესაძლებლობა გვქონდეს", - ასე უპასუხა მან შეკითხვას, როგორ რეაგირებს კრემლი ბრალდებებზე, რომ რუსეთი მოლდოვასა და საქართველოში არჩევნებზე ზემოქმედებას ცდილობს.

ამასთან, პესკოვმა დასძინა, რომ ხედავს საქართველოს საქმეებში "დასავლეთის მხრიდან უპრეცედენტო ჩარევის მცდელობებს"

"ის (დასავლეთი) არამხოლოდ ცდილობს თბილისს ხელები გადაუგრიხოს, ის პირდაპირ ცდილობს საკუთარი პირობების წაყენებას. რთულია წარმოიდგინო რომ ამაყი ქართველი ხალხი მოითმენს იმ ულტიმატუმებს, რომლებიც მათი მისამართით ყოველდღიურად ჟღერს", — თქვა მან.

ცნობისთვის, 20 ოქტომბერს, მოლდოვაში საპრეზიდენტო არჩევნები და ევროინტეგრაციის საკითხებზე რეფერენდუმი გაიმართა.

პრეზიდენტმა მაია სანდუმ, ცენტრალური საარჩევნო კომისიის მიერ წინასწარი მონაცემების გამოქვეყნების შემდეგ, სადაც მონაცემებმა აჩვენა რომ მოქალაქეების ნახევარზე მეტი ევროინტეგრაციის წინააღმდეგი იყო, განაცხადა რომ ქვეყნის თავისუფლებასა და დემოკრატიაზე უპრეცედენტო თავდასხმა განხორციელდა.

ამასთან, სანდუს მტკიცებით, არსებობდა იმის მტკიცებულებებიც, რომ კრიმინალური ჯგუფები ამომრჩევლების მოსყიდვას ცდილობდნენ და რომ საუბარი იყო 150 000-300 000 ხმაზე.