მიმდინარე წლის 23 ოქტომბერს, მთავრობამ მიიღო დადგენილება, რომლის მიხედვითაც რიგი ადმინისტრაციული შენობებისა და სტრატეგიული ობიექტების ბლოკირებაც პატიმრობით დაისჯება. ამ ჩამონათვალში მოხვდა პარლამენტი, ცენტრალური საარჩევნო კომისია, მთავრობის ადმინისტრაცია, და საპატრიარქოც.

მთავრობის დადგენილებაში, რომელსაც პრემიერმინისტრი აწერს ხელს, წერია, რომ სტრატეგიული ობიექტების ნუსხა სისხლის სამართლის კოდექსით გათვალისწინებული ორი მუხლის მიზნების მიხედვით განისაზღვრა, რომელთა მიხედვითაც — სტრატეგიული ან განსაკუთრებული მნიშვნელობის ობიექტის ხელში ჩაგდება ან ბლოკირება, რამაც შეიძლება შეაფერხოს ამ დაწესებულების ან ობიექტის ნორმალური მუშაობა, ორ წლამდე პატიმრობით ისჯება, იგივე ქმედება ჯგუფურად კი — ორიდან ოთხ წლამდე პატიმრობით. ხოლო სტრატეგიული ან განსაკუთრებული მნიშვნელობის ობიექტის ხელში ჩაგდება ან ბლოკირება ტერორისტული მიზნით ისჯება 10-დან 15 წლამდე პატიმრობით.

სტრატეგიული ან/და განსაკუთრებული მნიშვნელობის ობიექტების ნუსხაში მოხვდა:

1. საქართველოს უმაღლესი წარმომადგენლობითი ორგანოს ან/და აღმასრულებელი ხელისუფლების ორგანოების/დაწესებულებების, აგრეთვე ავტონომიური რესპუბლიკების უმაღლესი წარმომადგენლობითი ან/და აღმასრულებელი ორგანოების ადმინისტრაციული შენობები;

2. საქართველოს პრეზიდენტის ადმინისტრაციის ადმინისტრაციული შენობა;

3. საქართველოს მთავრობის ადმინისტრაციის ადმინისტრაციული შენობა;

4. საქართველოს საკონსტიტუციო სასამართლოსა და საერთო სასამართლოების ადმინისტრაციული შენობები;

5. საქართველოს იუსტიციის უმაღლესი საბჭოს ადმინისტრაციული შენობა;

6. საქართველოს ეროვნული ბანკის ადმინისტრაციული შენობა;

7. საელჩოები და საკონსულო დაწესებულებები;

8. საქართველოს ცენტრალური საარჩევნო კომისიის ადმინისტრაციული შენობა

9. საქართველოს საპატრიარქო;

10. მეტროპოლიტენი;

11. აეროპორტის ტერიტორია.

სტრატეგიული ან/და განსაკუთრებული მნიშვნელობის ობიექტების ნუსხაში სულ 33 ობიექტი მოხვდა.