საგარეო საქმეთა და უსაფრთხოების საკითხებში ევროკავშირის უმაღლესი წარმომადგენლის, ჯოზეფ ბორელის განცხადებაში წერია, რომ ევროკავშირი ღრმად შეშფოთებულია იმის თაობაზე, რომ ჩრდილოეთ კორეა უკრაინის წინააღმდეგ რუსეთის "უკანონო" "აგრესიულ" ომში მონაწილეობის მისაღებად ჯარებს აგზავნის.

ბორელის თქმით, ეს საერთაშორისო სამართლის, მათ შორის გაეროს წესდების ყველაზე ფუნდამენტური პრინციპების სერიოზულ დარღვევას წარმოადგენს.

"ეს იქნება ცალმხრივი მტრული ქმედება ჩრდილოეთ კორეის მხრიდან, რომელსაც სერიოზული შედეგები მოჰყვება ევროპისა და გლობალური მშვიდობისა და უსაფრთხოებისთვის. ეს განვითარება კიდევ ერთხელ ასახავს იმას, თუ როგორ ავრცელებს რუსეთი არასტაბილურობას და ესკალაციას რეგიონში და მთელ მსოფლიოში", — წერია განცხადებაში.

ბორელი ასევე აღნიშნავს იმ ფაქტს, რომ ევროკავშირი კატეგორიულად გმობს სამხედრო თანამშრომლობის გაღრმავებასა და შეიარაღების გადაცემას ჩრდილოეთ კორეასა და რუსეთს შორის, რაც უხეშად არღვევს გაეროს უშიშროების საბჭოს მრავალ რეზოლუციას, ხოლო ჩრდილოეთ კორეას მოუწოდებს, რომ რუსეთის უკანონო ომის მცდელობების მხარდაჭერა შეწყვიტოს.

"რუსეთის გაღრმავებული სამხედრო თანამშრომლობა კორეის სახალხო დემოკრატიულ რესპუბლიკასთან აგზავნის მკაფიო მესიჯს: მიუხედავად რუსეთის განცხადებისა, რომ მოლაპარაკებებისთვის მზადაა, ის არ არის გულწრფელად დაინტერესებული სამართლიანი, ყოვლისმომცველი და ხანგრძლივი მშვიდობით. პირიქით, რუსეთი ესკალაციას ახდენს და ეძებს დახმარებას თავისი ომისთვის, მათ შორის იმ აქტორებისგან, რომლებიც სერიოზულად არღვევენ გლობალურ მშვიდობასა და უსაფრთხოებას", — ვკითხულობთ გავრცელებულ განცხადებაში.

ამასთან, ბორელმა თქვა, რომ ევროკავშირი ამ საკითხზე, მათ შორის, რეაგირების თემაზე, პარტნიორებთან კოორდინაცია მოახდინეს.