ისრაელში მყოფი ქართველი ემიგრანტების თქმით, ისრაელში შესაძლოა ერთადერთი საარჩევნო უბანი ვერ გაიხსნას, რადგან არჩევნებამდე 2 დღით ადრე უბანს არც კომისიის თავმჯდომარე ჰყავს, არც მოადგილე და არც მდივანი. კომისიის წევრებიდან არ იციან 3-ის პასუხი, ხოლო თუ 7-მა წევრმა უარი თქვა მოვალეობის შესრულებაზე, უბანი ავტომატურად დაიხურება.

თელავივში გადაწყვეტილებებს ცენტრალური საარჩევნო კომისიიდან ელოდებიან, ხოლო საარჩევნო უბნების გახსნამდე მხოლოდ 24 საათი დარჩა.

"ცესკოს გთხოვთ, უზრუნველყოთ თქვენს მიერ დანიშნული კომისიის წევრების საარჩევნო უბანზე გამოცხადება", — ამბობს ემიგრანტი.

ერთ-ერთი ქართველი ემიგრანტის ვარაუდით, ოცნება წინასწარ გეგმავს, რომ რაღაცა ესკალაცია მოხდეს.

"4 ადამიანი არის ის, ვინც არც კონტაქტზე გამოდის და ჩემი ინფორმაციით, არ აპირებენ, რომ კომისიის წევრობა გაწიონ. ათვლის წერტილში დავბრუნდით ისევ, რომ შესაძლებელია ჩვენი საარჩევნო უბანი, რომელზეც ცესკოს მივაწვდინეთ ხმა, დაიკეტოს აქაური ვითარების გამო იმიტომ, რომ კომისია ვერ შედგება. შეგრძნებები გვაქვს, რომ თითქოს წინასწარ გეგმავენ, რომ რაღაცა ესკალაცია მოხდეს", — ამბობს ისრაელში მცხოვრები საქართველოს მოქალაქე.

ამასთან "ემგიდის" დამფუძნებელმა, ბაჩანა შენგელიამ ქართული ოცნების მიერ წინასწარ დაგეგმილ საბოტაჟზე ისაუბრა

"რაიმე იმედი რომ ჰქონდეს, იქ ხელისუფლებას არჩევნებზე მაღალი შედეგის დაფიქსირების, აქედან ჩაიყვანდნენ და იქ დანიშნავდნენ ადამიანებს, რომელიც ამ არჩევნებს ჩაატარებდა, ამიტომ, ეს არის მართლაც საბოტაჟი ამ პროცესის", — თქვა მან.