ეუთოს "დემოკრატიული ინსტიტუტებისა და ადამიანის უფლებების საერთაშორისო ოფისის" (ODIHIR) სადამკვირვებლო მისიის წარმომადგენლებთან პარტიებმა შეხვედრა ცალ-ცალკე გამართეს, ხოლო ქართული ოცნების შემდეგ, ოპოზიციის ლიდერები შეხვდნენ მათ.

შეხვედრაზე ძლიერი საქართველოს, ერთიანობის, გახარია საქართველოსთვის, ცვლილებებისთვის წარმომადგენლები მივიდნენ, რომლებმაც საერთაშორისო მისიას ყველა მტკიცებულება მიუტანეს, რომელიც ხელისუფლების მხრიდან არჩევნების მოპარვას და ძალაუფლების გახანგრძლივების მცდელობას ცხადყოფს.

"ოცნება ამტკიცებს, როგორც იცით, რომ თითქოს საარჩევნო გარემო არის მშვიდი და სამართლიანი და კონკურენტული. რეალურად, არის საპირისპირო. ჩვენ პარტია, მოგეხსენებათ, არის ოცნების მთავარი სამიზნე დაწყებული ივანიშვილის მუქარიდან დამთავრებული ჩვენი პარტიის წევრებზე თავდასხმებით და ბუნებრივია, ეს მტკიცებულებები მოვიტანეთ დამკვირვებლებთან და მთავარი სათხოვარი, რაც გვექნება მათთან, არის ის, რომ ყველაფერს დაერქვას თავისი სახელი, როდესაც დასრულდება კენჭისყრა და გამოქვეყნდება უკვე საბოლოო შედეგები. ძალიან ბევრი რამ იქნება დამოკიდებული იმაზე, გაბედავს თუ არა ივანიშვილი, რომ კენჭისყრის დღეს თავიდან აიცილოს ის დარღვევები, რაც ოცნებას დაგეგმილი აქვს, რაც რეგიონებში უკვე ხდება", — თქვა გახარიას გუნდის წევრმა, ნათია მეზვრიშვილმა.

ძლიერი საქართველოს ერთ-ერთმა ლიდერმა, სალომე სამადაშვილმა შეხვედრაზე შესვლამდე თქვა, რომ სადამკვირვებლო მისიასთან საუბარი წინასაარჩევნო გარემოზე და მოლოდინებზე ექნება.

"50-კაციანი შემადგენლობით არის ეუთოს საპარლამენტო ასამბლეის სადამკვირვებლო მისია. მე მექნება მათთან შეხვედრა. გავაცნობ იმ ვითარებას, რომელიც არის ქვეყანაში შექმნილი არჩევნების წინ და მექნება საუბარი იმაზე, რა მოლოდინი გვაქვს ჩვენ ჩვენი საერთაშორისო პარტნიორებისგან, რომ ხვალ ქართველი ხალხის გამარჯვება გაფორმდეს, საქართველოში ხელისუფლება შეიცვალოს ევროპული დღის წესრიგის კოალიციური მმართველობით და ჩვენ გარდამტეხი პოლიტიკური ცვლილებები დავიწყოთ ამ ქვეყანაში", — ამბობს სამადაშვილი.

ცნობისთვის, დილიდან საერთაშორისო მისიის წარმომადგენლებმა შეხვედრები ჩაატარეს ქართული ოცნების ლიდერებთან. ოპოზიციის შემდეგ დაგეგმილია ანტიკორუფციული ბიუროს ხელმძღვანელთან და ცესკოს თავმჯდომარესთანაც შეხვედრა.