"მთავარ არხს არასოდეს განუხორციელებია არცერთი უკანონო ტრანზაქცია", — ტელეკომპანია მთავარი არხი რუსთავი 2-ის მიერ 15 ოქტომბერს გავრცელებულ ბრალდებებს ეხმაურება, სადაც საუბარია, რომ კურიერს ხელში ჩაუვარდა მთავარი არხის ერთ-ერთი დირექტორის, გიორგი ქურდაძის საჩივარი, რომელიც ტელევიზიის შავ სალაროს ეხება — ქურდაძე იმ სქემას აღწერს, რომლითაც "ტელევიზიაში მილიონები სამი დირექტორის ხელმოწერის გვერდის ავლით მოძრაობს".

რუსთავი 2-ის მიერ გავრცელებული ინფორმაციის მიხედვით, ქურდაძემ წერილობითი კომუნიკაცია ბანკებთან 13 სექტემბრიდან დაიწყო "უკანონო ფულის ბრუნვის" შეჩერების მიზნით, მათ კი 7, 10 და 11 ოქტომბერს გაგზავნილი წერილები მოიპოვეს. ქურდაძე ამტკიცებს, რომ კომპანიების დირექტორებმა — ნიკა გვარამიამ, თეა გვარამიამ, გიორგი გაბუნიამ და მანუჩარ ახალაიამ იცოდნენ ნაღდი ფულის ბრუნვის შესახებ.

მთავარი არხი უარყოფს რუსთავი 2-ის ბრალდებებს და წერს, რომ "არხის ერთ-ერთი დამფუძნებლის, ზაზა ოქუაშვილის მიერ დანიშნული დირექტორის, გოგი ქურდაძის გამოგონილი ბრალდებები ემსახურება ერთადერთ მიზანს — ხელოვნურად შეუქმნას პრობლემები ქვეყნის ყველაზე გავლენიან კრიტიკულ არხს და, შედეგად, არჩევნებამდე რამდენიმე დღით ადრე შეწყდეს მისი მაუწყებლობა, რაც მხოლოდ და მხოლოდ ოცნების რუსული რეჟიმის ინტერესებს ემსახურება".

"ვეხმაურებით ხელისუფლების პროპაგანდისტული მედიის მიერ გავრცელებულ დეზინფორმაციას, თითქოს, მთავარ არხზე ადგილი ჰქონდეს თანხების უკანონო ბრუნვას.

პირველ რიგში, ვაცხადებთ, რომ მთავარ არხს არასოდეს განუხორციელებია არცერთი უკანონო ტრანზაქცია.

სამწუხაროდ, არხის ერთ-ერთი დამფუძნებლის, ზაზა ოქუაშვილის მიერ დანიშნული დირექტორის, გოგი ქურდაძის გამოგონილი ბრალდებები ემსახურება ერთადერთ მიზანს — ხელოვნურად შეუქმნას პრობლემები ქვეყნის ყველაზე გავლენიან კრიტიკულ არხს და, შედეგად, არჩევნებამდე რამდენიმე დღით ადრე შეწყდეს მისი მაუწყებლობა, რაც მხოლოდ და მხოლოდ ოცნების რუსული რეჟიმის ინტერესებს ემსახურება.

გოგი ქურდაძის წერილში გაჟღერებული ცრუ ბრალდებები იმდენად აბსურდულია, რომ არც კი იმსახურებს არხის და ჩვენი მაყურებლის დამატებით ყურადღებას.

ამდენწლიანი ბრძოლის შემდეგ ქართული ოცნება მთავარი არხის ერთ-ერთი დამფუძნებლის წარმომადგენლის ხელითაც ვერ მიაღწევს მიზანს და ვერ გაგვაჩერებს. ჩვენი გუნდი მტკიცედ და შეუპოვრად გააგრძელებს საქართველოს ევროპული მომავლისთვის ბრძოლას და ქართველ ხალხთან ერთად მოიპოვებს საბოლოო გამარჯვებას", — ნათქვამია მთავარი არხის მეირ გავრცელებულ ინფორმაციაში.

რუსთავი 2-ის მიერ გავრცელებულ ინფორმაციას პრემიერმინისტრიც გამოეხმაურა. ირაკლი კობახიძის თქმით, მთლიანად ოპოზიცია და მათ შორის ყველა ოპოზიციური ტელევიზია მუშაობს შავი ფულით და საქმეს შესაბამისი უწყებები შეისწავლიან.

"ზოგადად ყველამ იცის, რომ მთლიანად ოპოზიცია და მათ შორის ყველა ოპოზიციური ტელევიზია მუშაობს შავი ფულით, ფინანსდება შავი ფულით. ეს არ არის ახალი ამბავი, თუმცა ნუ ალბათ არის ახალი დეტალები გამოკვეთილი ამ თემასთან დაკავშირებით. ეს ყველაფერი მიანიშნებს იმაზე, რომ ზოგადად ეს პოლიტიკური ძალები ასრულებენ ძალიან ნეგატიურ როლს ჩვენს პოლიტიკურ ცხოვრებაში. ისინი ხელს უშლიან დემოკრატიული სისტემის ჯანსაღი ფორმით ფუნქციონირებას და ის, რომ კონკრეტული ტელევიზიები, მედიასაშუალებები არიან ქცეული სიცრუის პროპაგანდის ინსტრუმენტებად, რა თქმა უნდა, ამაშიც შავი ფულის როლი არის განსაკუთრებული. არ ვიცი, შესაბამისი უწყებები ალბათ შეისწავლიან ამ საქმეს", – თქვა ირაკლი კობახიძემ.

მთავარ არხთან დაკავშირებით რუსთავი 2-ის მიერ გავრცელებულ ინფორმაციას, პრემიერმინისტრის შემდეგ, პარლამენტის თავმჯდომარე, შალვა პაპუაშვილი ეხმაურება. პაპუაშვილის თქმით, საქმე "შესაბამისმა უწყებებმა უნდა შეისწავლონ".

"ადამიანებს როცა აქვთ ერთი სტილი უკანონობის, ამ სტილს შემდეგ აღარ სცილდებიან. ვნახოთ, იმედია, შეისწავლიან ამ საკითხს შესაბამისი უწყებები და გვეცოდინება უფრო მეტი", – აცხადებს პაპუაშვილი.