უნგრეთის პრემიერ-მინისტრმა, ვიქტორ ორბანმა, ევროპარლამენტის მიმდინარე კვირის დებატებს "ჯვარცმის მცდელობა" უწოდა.

"ყველას, ვინც დებატებში შემოვიდა, ჩვენი სისხლი სურდა და არა აზრიანი დებატი", — განაცხადა პოპულისტმა ლიდერმა ვიქტორ ორბანმა

ორბანის განცხადების ცენტრში ევროკომისიის პრეზიდენტი ურსულა ფონ დერ ლაიენი მოექცა. ფონ დერ ლაიენმა საკუთარ გამოსვლაში უნგრეთის პრემიერი მწვავედ გააკრიტიკა ვლადიმირ პუტინთან ურთიერთობის დათბობისთვის, ჩინეთისა და რუსეთის ინტერესების გატარებისთვის და უნგრელი ხალხის დაღალატებისთვის.

"ფონ დერ ლაიენმა და და ევროპის სახალხო პარტიის ლიდერმა, მანფრედ ვებერმა ღიად განაცხადეს, რომ უნგრეთის მთავრობის დამხობა სურთ. ფაქტი, რომ ევროპულ საქმეებზე ზრუნვის ნაცვლად ამას ღიად გვეუბნებიან, ღიად ცდილობენ წევრი ქვეყნის მთავრობის შეცვლას სხვა მთავრობით, სამარცხვინო და უჩვეულოა", — განაცხადა ვიქტორ ორბანმა

უნგრეთის ლიდერმა განაცხადა ისიც, რომ ევროკავშირის ორ მთავარ პოლიტიკურ ჯგუფს უკვე მისი შემცვლელი კანდიდატიც კი ჰყავს შერჩეული.