აშშ-ის ყოფილმა პრეზიდენტმა და პრეზიდენტობის ამჟამინდელმა კანდიდატმა კიდევ ერთხელ გაიმეორა, რომ ნოემბერში პრეზიდენტად არჩევის შემთხვევაში, უკრაინის წინააღმდეგ რუსეთის ომს ინაუგურაციამდე, 2025 წლის იანვრამდე, დაასრულებს.

ექსპრეზიდენტმა განცხადება უკრაინის ლიდერთან ნიუ-იორკის Trump Tower-ში შეხვედრამდე გააკეთა.

ზელენსკის თქმით, ტრამპთან შესახვედრად იმისთვის მივიდა, რომ გააცნოს გამარჯვების გეგმა, რომელიც ჯო ბაიდენსა და ვიცე-პრეზიდენტ კამალა ჰარისს უკვე წარუდგინა, როცა ხუთშაბათს მათ ვაშინგტონში შეხვდა.

უკრაინის პრეზიდენტის განცხადებით, ის და ტრამპი იზიარებენ მოსაზრებას, რომ ომი უნდა დასრულდეს, პუტინმა ვერ უნდა გაიმარჯვოს და უკრაინელებმა უნდა გაიმარჯვონ.

ტრამპის განცხადებით, მას და ზელენსკის შესანიშნავი ურთიერთობა აქვთ და ტყუილია, თითქოს 2019 წელს ჯო ბაიდენის წინააღმდეგ უკრაინაში გამოძიების დასაწყებად, მან უკრაინის პრეზიდენტს დაურეკა და მასზე ზეწოლა სცადა.

მცირე ხნის წინ, ტრამპმა უკრაინის ლიდერთან შეხვედრა გააუქმა მას შემდეგ, რაც ზელენსკი სკრანტონის იარაღის ქარხანას ეწვია პენსილვანიაში, რამაც რესპუბლიკური პარტიის აღშფოთება გამოიწვია. ტრამპის პოზიცია შეიცვალა მას შემდეგ, რაც უკრაინის პრეზიდენტი დემოკრატების კანდიდატ კამალა ჰარისს შეხვდა და ამ უკანასკნელმა კიევს ურყევი მხარდაჭერა აღუთქვა. ამ შეხვედრისას კამალა ჰარისმა აღნიშნა, რომ აშშ-ში არიან ადამიანები, რომლებსაც სურთ, უკრაინამ დათმოს ტერიტორიები და გახდეს ნეიტრალური.