კვირას, 15 სექტემბერს, პრინცი ჰარი, სასექსის ჰერცოგი, 40 წლის გახდა. პრინცმა ჰარიმ 2021 წელს ოფიციალურად თქვა უარი ბრიტანეთის სამეფო ოჯახის წევრობაზე და ოფიციალური მოვალეობების შესრულებაზე. ამ წლების განმავლობაში მისთვის დაბადების დღე საჯაროდ ოჯახის არცერთ წევრს არ მიულოცავს.

სოციალურ ქსელ X-ზე სამეფო ოჯახის ოფიციალურმა გვერდმა პრინცის ფოტო დაპოსტა. "ვულოცავთ სასექსის ჰერცოგს მეორმოცე დაბადების დღეს და ბედნიერებას ვუსურვებთ!" — წერია განცხადებაში.

ბუკინგემის სასახლის მილოცვა პრინცი უილიამისა და ქეით მიდლტონის ოფიციალურმა გვერდმაც გააზიარა. "ვუსურვებთ ბედნიერ მეორმოცე დაბადების დღეს სასექსის ჰერცოგს!" — დაწერეს ბრიტანეთის მომავალმა მეფემ და დედოფალმა.

ჰარი და უილიამი ერთმანეთისგან გაუცხოებულები არიან მას შემდეგ, რაც ჰარი და მისი ცოლი, მეგან მარკლი, 2020 წელს მონარქიას განუდგნენ და ფორმალური მოვალეობების შესრულება შეწყვიტეს. ძმებს შორის არსებული განხეთქილება კიდევ უფრო გაღრმავდა მას შემდეგ, რაც ჰარიმ 2023 წელს თავისი მემუარი, Spare გამოსცა.

ჰარიმ და მეგანმა თავიანთი სამეფო ტიტულები შეინარჩუნეს და შვილებს, 5 წლის არჩის და 3 წლის ლილიბეტს კალიფორნიაში ზრდიან.

იხილეთ ასევე: