ტელეკრიტიკოსთა ასოციაციის ყოველწლიურ დაჯილდოებაზე Hulu-ს სერიალი Handmaid's Tale წლის საუკეთესო დრამად დასახელდა.

მხევლის წიგნი მარგარეტ ეტვუდმა 1985 წელს გამოაქვეყნა და მისმა პოპულარობამაც არ დააყოვნა. გაიყიდა წიგნის მილიონობით ეგზემპლარი, ითარგმნა უამრავ ენაზე და დამატებითი ტირაჟებით გამოცემაც არ შეწყვეტილა.

მხევლის წიგნში დისტოპიური სამყაროა აღწერილი: ამერიკის შეერთებული შტატები აღარ არსებობს, ძალაუფლება მთლიანად რელიგიური მამაკაცების ხელში აღმოჩნდა და დამყარდა ქრისტიანობის სახელით შენიღბული დიქტატურა.

რელიგიური მოტივებით, ქალებს წაერთვათ საკუთრების ფლობისა და საკუთარი ცხოვრების განკარგვის უფლება. ახლა ქალები კასტებად არიან დაყოფილნი და მთლიანად კაცებისა და ქვეყნის საჭიროებებს ემსახურებიან.

ეტვუდის რომანი ერთგვარი წინასწარმეტყველებაა, მომავალი, რომელიც შესაძლოა დადგეს, თუ რელიგიურ ფანატიზმს თავიანთი ძალაუფლების განსამტკიცებლად გამოიყენებენ, ხოლო რელიგიას საშიშ იარაღად აქცევენ.

რაც მთავარია, წიგნი ერთ თავზარდამცემ სიმართლესაც გვიმხელს, ეტვუდი სარკეში გვახედებს და გვეუბნება, რომ თუ დიდხანს დავხუჭავთ თვალს ძალადობაზე, თუ ჩავთვლით, რომ ახალ ამბებში მოსმენილი და ნანახი ყოველი შემთხვევა ჩვენ არ გვეხება, ერთ მშვენიერ დღეს აუცილებლად გავიღვიძებთ სამყაროში, რომელიც ძალიან არ მოგვეწონება, მაგრამ უკვე აღარავინ იქნება დარჩენილი, ვისაც ეს ააღელვებს.

Hulu-ს სერიალში მთავარ როლს ელიზაბეტ მოსი ასრულებს.

შოუმ ემის რამდენიმე ნომინაცია დაიმსახურა, მათ შორის საუკეთესო დრამატული სერიალი და საუკეთესო მსახიობი ქალი.

წაიკითხეთ - ემა უოტსონის ინტერვიუ "მხევლის წიგნის" ავტორ მარგარეტ ეტვუდთან