კავკასიის გარემოსდაცვითი ორგანიზაციების ქსელი (CENN) სტუდენტურ-ახალგაზრდული სათათბიროს (Student-Youth Council) განცხადებას ეხმაურება და ხაზგასმით აღნიშნავს, რომ ბრალდება, რომელიც აღნიშნულმა ორგანიზაციამ გაავრცელა, მცდარი და უსაფუძვლოა.

CENN-ში ამბობენ, რომ გრანტის გაცემისას შემფასებელი კომისიის შერჩევის კრიტერიუმებში არ შედის აპლიკანტი ორგანიზაციების რუსული კანონის რეესტრში რეგისტრაცია/არ რეგისტრაციის საკითხი, ხოლო უკუკავშირს (რის გამო ვერ მოიპოვა გრანტი ორგანიზაციამ) დაინტერესებული პირები წინასწარ დადგენილ ვადებში მიიღებენ.

კავკასიის გარემოსდაცვითი ორგანიზაციების ქსელის მიერ მოწოდებულ წერილობით განმარტებას უცვლელად გთავაზობთ:

"CENN-ს სურს გამოეხმაუროს სტუდენტურ-ახალგაზრდული სათათბიროს განცხადებას.
ვადასტურებთ, რომ აღნიშნული ორგანიზაცია მონაწილეობას იღებდა ევროკავშირის მხარდაჭერით მიმდინარე პროექტ "მწვანე გურიას" ფარგლებში გამოცხადებულ საგრანტო კონკურსში.

შემფასებელი კომისიის მიერ მოხდა აღნიშნული პროექტის შეფასება, რომელმაც გაიარა, როგორც შეფასების, ისე გასაუბრების ეტაპი.

გასაუბრების შემდეგ კომისიამ მიიღო გადაწყვეტილება აღნიშნული პროექტის არდაფინანსებაზე რიგი მიზეზის გამო. მათ შორის იმის გამო, რომ ბიუჯეტში გათვალისწინებული იყო საგრანტო სახელმძღვანელოს მიხედვით დაუშვებელი ხარჯები.

შერჩევის კრიტერიუმებში არ შედის ორგანიზაციების რეესტრში რეგისტრაცია/არრეგისტრაციის საკითხი. თუმცა, ვინაიდან ეს არის ფინანსური გრანტი, ჩვენ მოგვეთხოვება, დონორის წესების თანახმად, ვიცოდეთ ორგანიზაციების მდგრადობის საკითხი და გეგმები. შესაბამისად, გასაუბრების დროს ერთ-ერთი შეკითხვა ეხებოდა რეგისტრაციას.

ხაზგასმით გვინდა აღვნიშნოთ, რომ СENN-ს არ გაუკეთებია არანაირი მოწოდება იმის შესახებ, რომ სამოქალაქო სექტორის ორგანიზაციები დარეგისტრირებულიყვნენ უცხოური ძალის ინტერესების გამტარებელ ორგანიზაციათა რეესტრში. ასევე, აღნიშნული არ ყოფილა შერჩევის კრიტერიუმი.

რაც შეეხება უკუკავშირის მიწოდებას. უკუკავშირების მიწოდება მოხდება წინასწარ განსაზღვრული ვადების თანახმად. უკუკავშირების მიწოდების ვადა ამ ეტაპზე არ არის გასული და CENN აუცილებლად ყველა აპლიკანტს ვადის ფარგლებში მიაწოდებს წერილობით უკუკავშირს," — ნათქვამია CENN-ის წერილობით განმარტებაში.

შეგახსენებთ, დღეს 6 სექტემბერს CENN-ის ოფიციალურ FACEBOOK-ის გვერდზე გავრცელდა განცხადება. სადაც ეწერა, რომ ორგანიზაციამ "მიიღო მძიმე, მაგრამ ამ ეტაპისათვის საჭირო გადაწყვეტილება" და ის უცხოური გავლენის გამჭვირვალობის შესახებ კანონის ფარგლებში შექმნილ რეესტრში რეგისტრირდება.

აღნიშნულ განცხადებას მალევე გამოეხმაურა Student-Youth Council. მათ მიერ გავრცელებულ ტექსტში ეწერა, რომ მათ CENN-მა გრანტი იმ მიზეზით არ მისცა, რომ ისინი რუსული კანონთან დაკავშირებულ რეესტრში არ რეგისტრირდებიან.