ნორვეგიის მეფის, ჰარალდ V-ის უფროსი შვილი, პრინცესა მართა ლუიზი ამერიკელ თვითგაცხადებულ შამანზე დაქორწინდა. ცერემონია სამდღიანი წინასაქორწილო წვეულების შემდეგ შაბათს ჩატარდა.

52 წლის მართა ლუიზი და დურეკ ვერეტი, რომელიც, მისი თქმით, მეექვსე თაობის კალიფორნიელი შამანია, ნორვეგიის ერთ-ერთ ყველაზე ლამაზ ქალაქში, გეირანგერში დაქორწინდნენ, რომელიც ქვეყნის ყველაზე პოპულარული ტურისტული ლოკაციაა.

წყვილის წინასაქორწილო აღნიშვნები ხუთშაბათს დაიწყო, შაბათს კი ინფლუენსერებით, რეალითი შოუების ვარსკვლავებითა და მსახიობებით დახუნძლული ქორწილი უდიდეს თეთრ კარავში მოეწყო. სტუმართა თქმით, ქორწილში მუსიკალური ნომრები ნორვეგიელმა და ამერიკელმა მომღერლებმა, ეკლესიის მგალობლებმა და ნორვეგიული ძირძველი ტომის, საამების წარმომადგენელმა შეასრულეს.

ფოტო: Reuters

პრინცესას თქმით, მას ანგელოზებთან საუბარი შეუძლია და 2018 წლამდე ხალხს ამაში "ამეცადინებდა" კიდეც. დურეკ ვერეტი კი ამბობს, რომ ბევრ სულთან ამყარებს კომუნიკაციას და მედალიონი აქვს, რომლის წყალობითაც შელოცვებს და დაავადებებს ამარცხებს. ვერეტი ასევე ამტკიცებს, რომ 4 წუთისა და 25 წამის განმავლობაში გარდაცვლილი იყო, თუმცა ისევ გაცოცხლდა. "მეორე მხარეს ვიყავი, ყველა ინფორმაცია მივიღე და უკან დავბრუნდი" — განუცხადა მან ჟურნალისტებს.

წყვილმა ქორწილის ფოტოები ბრიტანულ გამოცემას Hello! მიჰყიდა, თავიანთ სასიყვარულო ისტორიაზე ფილმის საავტორო უფლებები კი Netflix-ს. ამან ნორვეგიული მედიის აღშფოთება გამოიწვია. მათი თქმით, ეს მოლაპარაკებები ადგილობრივი პრაქტიკის საწინააღმდეგოა. აღსანიშნავია, რომ პრინცესა მართა ლუიზი და დურეკ ვერეტი ხშირად უპირისპირდებიან ნორვეგიულ მედიას, თუმცა საკუთარ პირად ცხოვრებას სხვადასხვა სოციალურ ქსელში აქტიურად გვაჩვენებენ.

ფოტო: Reuters

ქორწილს მეფე ჰარალდი და დედოფალი სონია ნორვეგიის სამეფო ოჯახის სხვა წარმომადგენლებთან ერთად დაესწრნენ. ქორწილში იმყოფებოდა, ასევე, შვედეთის მომავალი დედოფალი, პრინცესა ვიქტორია თავის ქმართან, პრინც დანიელთან და ძმასთან, პრინც კარლ ფილიპთან ერთად.

პრინცესა მართა ლუიზს წინა ქორწინებიდან სამი შვილი ჰყავს. მისი ყოფილი ქმარი მწერალი არი ბენია, რომელსაც 14-წლიანი ქორწინების შემდეგ 2017 წელს გაშორდა.

წყვილი 2022 წელს დაინიშნა. ქორწინების შემდეგ ვერეტი სამეფო ტიტულს ვერ მიიღებს.