ტელევიზიას რომ ნამდვილად ოქროს ხანა აქვს ამაზე არაჩვეულებრივი სერიალების გარდა, იქ, კინოდან ტელევიზიაში გადანაცვლებული მსახიობების სიაც მეტყველებს.

მერილ სტრიპის, ნიკოლ კიდმანის, ჯულია რობერტსის, დაიან კიტონისა და სხვა დიდი ვარკვლავების შემდეგ, სულ მალე ტელევიზიის ეკრანზე ლეგენდარულ ფრანგ მსახიობს, იზაბელ იუპერსაც ვიხილავთ.

მსახიობი Mad Men-ის შემქმნელის მეთიუ ვეინერის ახალ დრამაში The Romanoffs, რომელსაც ამაზონი გადაიღებს, მთავარ როლს შეასრულებს.

აღსანიშნავია ისიც, რომ იუპერს პარტნიორობას სწორედ Mad Men-ის ორი ვარსკვლავი კრისტინა ჰედრიკსი და ჯონ სლატერი გაუწევენ.

მეთიუ ვეინერის ახალ სერიალში მოქმედება თანამედროვე ეპოქაში ხდება, თუმცა ის იმ ადამიანებზე მოგვითხრობს, რომლებსაც თავი რომანოვების შთამომავლები ჰგონიათ.

როგორც იცით, 1918 წლის ივლისში რუსეთის იმპერატორი ნიკოლოზ მეორე თავის ხუთ შვილთან და ცოლთან, იმპერატრიცა ალექსანდრასთან ერთად დახოცეს. ამ ღამესთან დაკავშირებით არსებობს, ერთი თეორია, რომლის მიხედვითაც ერთ-ერთი შვილი გადარჩა.

როგორც ცნობილია, სერიალის პრემიერა 2018 წლის გაზაფხულზე იგეგმება.