სამეფო კარის თამაშების მეშვიდე სეზონის მესამე სერიაში ამ პერსონაჟმა იმდენად სწრაფად ჩაიქროლა, რომ შესაძლოა მისი შემჩნევა ვერც კი მოასწარით, თუმცა უნდა ითქვას, რომ ის უკვე წლებია შოუს ნაწილია.

მას შემდეგ, რაც ახალ ეპიზოდში და-ძმა ლანისტერებმა ღამე ერთად გაატარეს, მათი სიმყუდროვე სერსეის მოახლემ, ბერნადეტემ დაარღვია.

ადრინდელისგან გასხვავებით, სერსეი სულაც აღარ ცდილობდა ჯეიმი დაემალა, პირიქით, არც ადარდებდა ეს, როგორც თვითონ თქვა, ახლა ის დედოფალია და შეუძლია გააკეთოს ის, რაც სურს.

კარი იღება და ვხედავთ ბერნადეტეს, რომელიც, შეიძლება ითქვას, რომ ძალიან ჰგავს მის ახალ დედოფალს, სერსეი ლანისტერს. გასაკვირი ნამდვილად არ ყოფილა, ის წლების განმავლობაში ზუსტად ისე იცვლიდა გარეგნობასა და ვარცხნილობას, როგორც მისი ბოსი და ახლა უკვე დედოფალი.

თუ ბერნადეტეს ისტორიას მივყვებით, გაგვახსენდება, რომ თავიდან ის სანსას მოახლე იყო და შეესწრო ფაქტს, როდესაც სანსა და ცხონებული შაი ცდილობდნენ სტარკის პირველი მენსტრუაციის ამბავი დაემალათ, თუმცა ბერნადეტე რის ბერნადეტე იქნებოდა, ამ ყველაფრის თქმა სერსეისთვის არ მოენდომებინა, მაგრამ არ გამოუვიდა, შაიმ ყელზე დანა მიადო და მოკვლით დაემუქრა, თუმცა ასე იყო თუ ისე, საბოლოოდ დედოფალმა მენსტრუაციის ამბავი მაინც გაიგო.

თუ გონებას დაძაბავთ ისიც გაგახსენდებათ, რომ სწორედ მან წარადგინა ტირიონი სანსა სტარკის წინაშე, როდესაც აწ უკვე დრაკონების დედის მარჯვენა ხელი, სტარკისთვის ხელის თხოვნას აპირებდა.

მანვე შეატყობინა სერსეი ლანისტერს, რომ ტირიონი და შაი ერთად გამოიჭირა.

და ყველაზე მთავარი, ის სერსეის გვერდით იყო მისთვის ყველაზე მნიშვნელოვან მომენტებშიც. მაგალითად, სწორედ ბერნადეტემ შეატყობინა მირსელას დორნში დაბრუნების ამბავი და სწორედ ის ეხმარებოდა ჩაცმაში დედოფალს, როდესაც მეექვსე სეზონის ფინალურ ეპიზოდში ყველაზე და ყველაფერზე იძია შური.

მოკლედ რომ ვთქვათ, ბერნადეტემ ბევრი იწვალა და საბოლოოდ თავისი კარიერის უმაღლეს საფეხურს მიაღწია, ახლა დედოფლის მთავარი მსახურია.

შეიძლება ჯერ ვერ ვამჩნევთ, მაგრამ კარგად თუ დავფიქრდებით, მივხვდებით, რომ ბერნადეტე არის პერსონაჟი, რომელიც ყველაზე უკეთ ხედავს და ყველაზე უკეთ იცის რა ხდება ლანისტერების სასახლეში. ასევე ფიქრობენ სერიალის გულშემატკივრები და ამბობენ, რომ ის სამეფო კარის თამაშების წონიანი და საინტერესო პერსონაჟია, მერე რა თუ ჯერ მხოლოდ რამდენიმე წინადადება აქვს ნათქვამი, მისი მთავარი კოზირიც სწორედ ეს არის, ბევრს ხედავს და ცოტას ლაპარაკობს.

სერიალის მაყურებლები ვარაუდობენ იმასაც, რომ სერსეის ცხოვრებაში სწორედ ბერნადეტე შეასრულებს მთავარ როლს და ის იქნება საკვანძო პერსონაჟი მის აღსასრულში.

ვარაუდობენ იმასაც, რომ შესაძლოა არია სტარკი სწორედ ბერნადეტეს სახით გამოეცხადოს სერსეის და ერთხელ და სამუდამოდ გამოასალმოს სიცოცხლეს.