სპეციალურმა საგამოძიებო სამსახურმა, ყოფილი მეუღლის მიმართ ჯანმრთელობის დაზიანების მუქარის ბრალდებით, შსს-ს სასაზღვრო პოლიციის თანამშრომელი დააკავა.

გამოძიება ამბობს, რომ ბრალდებული ეჭვიანობის ნიადაგზე მეუღლის მიმართ აგრესიას გამოხატავდა, სამსახურისთვის თავის დანებებას სთხოვდა და სიტყვიერ შეურაცხყოფას აყენებდა. კონფლიქტის გამო დაზარალებული ბრალდებულთან განქორწინდა.

მიუხედავად ამისა, 24 ივლისს, ღამის საათებში, ქობულეთის მუნიციპალიტეტის სოფელ ციხისძირში, სამართალდამცავი ავტომობილით დაედევნა ყოფილ მეუღლეს და შეჩერება მოსთხოვა, ავტომობილთან მივიდა და პირსინგის ახევით და ჯანმრთელობის დაზიანებით დაემუქრა.

ქალის სარჩელის შემდეგ, სპეციალურმა საგამოძიებო სამსახურმა დაკითხა დაზარალებულის ოჯახის წევრები და საქმესთან შემხებლობაში მყოფი სხვა პირები, ჩატარდა საგამოძიებო ექსპერიმენტი და დანაშაულში მამხილებელი სხვა მტკიცებულებებიც მოძიებული იქნა, რაზეც სამართალდამცავი დააკავეს.

სპეციალური საგამოძიებო სამსახური საქმეზე გამოძიებას საქართველოს სისხლის სამართლის კოდექსის 11 პრიმა 151-ე მუხლის მე-2 ნაწილის „დ“ ქვეპუნქტით აგრძელებს.

სამართალდამცავს ბრალდება კანონით დადგენილ ვადაში წარედგინება.

დანაშაული 3 წლამდე თავისუფლების აღკვეთას ითვალისწინებს.