ამერიკელი კონგრესმენი მაიკ ტერნერი და სენატორი ჯინ შაჰინი ოფიციალური ვიზიტით საქართველოს დღეს, 9 აგვისტოს, ესტუმრნენ.

ვიზიტი, საქართველოსა და აშშ-ს შორის გართულებული ურთიერთობების ფონზე მიმდინარეობს. დღეს, საქართველოს პრეზიდენტმა გაავრცელა ჯო ბაიდენის წერილიც, რომელშიც შეერთებული შტატების პრეზიდენტი იმედგაცრუებას გამოთქვამს საქართველოს მთავრობის ანტიდემოკრატიული ნაბიჯების გამო.

სალომე ზურაბიშვილი X-ზე წერს, რომ შეხვედრაზე 2024 წლის საპარლამენტო არჩევნები, რუსული ოკუპაცია, ჰიბრიდული ომი და შავი ზღვის უსაფრთხოებასთან დაკავშირებული საკითხები განიხილეს.

"შევხვდი საქართველოს მეგობრებს, სენატორ შაჰინსა და კონგრესმენ ტერნერს. განვიხილეთ ორმხრივი ურთიერთობები, საქართველოს ევროატლანტიკური ინტეგრაცია, მომდევნო არჩევნები, რუსული ოკუპაცია, ჰიბრიდული ომი და შავი ზღვის უსაფრთხოება. მათი ვიზიტი საქართველოს მიმართ აშშ-ს მხრიდან მტკიცე მხარდაჭერის კიდევ ერთი დასტურია". — წერია პრეზიდენტის განცხადებაში