ვენესუელას ხელისუფლებამ, რომელიც უკვე რამდენიმე თვეა ქვეყანას კრიზისში მართავს და ამასთანავე, ვერ აკონტროლებს პარლამენტს, გადაწყვიტა, შექმნას საკანონმდებლო ორგანოს ერთგვარი ალტერნატივა, რომელსაც პარლამენტზე მეტი ძალაუფლება ექნება.

ახალი საკონსტიტუციო ორგანოს პირველი არჩევნები ვენესუელაში 30 ივლისს ჩატარდა. არჩევნებში მონაწილეობა, ცენტრალური საარჩევნო კომისიის ცნობით, მოსახლეობის 41-მა პროცენტმა მიიღო. სხვა მონაცემები აქვს ქვეყნის ოპოზიციას, მათი მტკიცებით, მოსახლეობის 88 პროცენტს საერთოდ არ მიუღია მონაწილეობა არჩევნებში.

"საკონსტიტუციო ასამბლეის“ პირველი არჩევნები ვენესუელაში ძლიერი დაძაბულობის ფონზე ჩატარდა. პოლიციელებთან შეტაკებისას, სულ მცირე, 10 ადამიანი დაიღუპა.

ქვეყნის ოპოზიციამ არჩევნებს უნდობლობა გამოუცხადა. ორ აგვისტოს, იმ დღეს, როდესაც საკონსტიტუციო ასამბლეა პირველად შეიკრიბება, ოპოზიციამ უკვე დააანონსა მაშტაბური აქცია.

ახალი საკონსტიტუციო ორგანოს შექმნის საკითხი რეფერენდუმზე მადუროს ინიციატივით გავიდა. მოსახლეობის უნდა გაეკეთებინა არჩევანი, სურდა თუ არა ახალი საკანონმდებლო ორგანოს – საკონსტიტუციო ასამბლეის შექმნა. ინიციატივა მიზნად ისახავს ახალი საკანონმდებლო ორგანოს შექმნას, რომელსაც ექნება უფლება, არაქმედითად გამოაცხადოს ქვეყნის პარლამენტი და ასევე, შეაჩეროს პარლამენტის მიერ მიღებული ნებისმიერი გადაწყვეტილება. ეს ინიციატივა დაეხმარება მადუროს, იმოქმედოს პარლამენტის გვერდის ავლით, რომელსაც ქვეყნის ოპოზიცია აკონტროლებს. მოცემული გადაწყვეტილებით, ქვეყნის პარლამენტს სრულად ერთმევა ძალაუფლება.

არჩევნებს და ახალ საკანონმდებლო ორგანოს არ აღიარებს საერთაშორისო თანამეგობრობის არც ერთი წევრი. თეთრი სახლი კი ვენესუელას მიმართ სანქციების გაფართოებას გეგმავს.

ვენესუელაში თითქმის ნახევარი წელია მძიმე პოლიტიკური და ეკონომიკური კრიზისია. მოცემულ ვითარებაში ნაკლებად სავარაუდოა მდგომარეობის ნორმალიზაცია, ოპოზიციამ მრავალმილიონიანი აქციები დააანონსა.