შეუქმნა თუ არა ირაკლი კობახიძეს უხერხულობა ირანის პრეზიდენტის ფიცის დადების დროს შეძახილებმა დარბაზში: "სიკვდილი ამერიკას" და "სიკვდილი ისრაელს" — ეს კითხვა დღეს პრემიერ-მინისტრს ჟურნალისტებმა დაუსვეს.

"მე ვესწრებოდი ირანის პრეზიდენტის ინაუგურაციას. ირანი არის ძალიან მნიშვნელოვანი სახელმწიფო რეგიონში და სწორედ ამის გათვალისწინებით, ამ ინაუგურაციას ესწრებოდა რეგიონის უკლებლივ ყველა სახელმწიფო. ამ ინაუგურაციას ესწრებოდა ჯოზეფ ბორელის პირადი წარმომადგენელი, გაეროს გენერალური მდივნის პირადი წარმომადგენელი. ანუ, წარმომადგენლობითი იყო იქ შემადგენლობა.

რაც შეეხება თვითონ რეგიონს, რეგიონი იყო უმაღლეს დონეზე წარმოდგენილი. აქ იყვნენ, მათ შორის, აზერბაიჯანის პრემიერ-მინისტრი, სომხეთის პრემიერ-მინისტრი.

რაც შეეხება თვითონ ამ თემას, მე როგორც მითხრეს, ლომჯარიას ჰქონია პირადად დავალებული ამ თემის აწევა, თუმცა მაინცდამაინც დიდი წარმატება არ აქვს, თუმცა მინდა გითხრათ, რომ ლომჯარიები არიან სომხეთშიც, მაგრამ სომეხ ლომჯარიებს ეს თემა სომხეთში არ აუწევიათ, რატომ? იმიტომ, რომ სომეხ ლომჯარიებს არ დაავალეს იგივე თემა, რაც დაავალეს ქართველ ლომჯარიას. ეს არის სამარცხვინო სპეკულაცია", — თქვა ირაკლი კობახიძემ.

ირანის პრეზიდენტის ინაუგურაცია თეირანში გუშინ გაიმართა. ქვეყნების მიწვეული ლიდერების გარდა, ცერემონიას დაესწრნენ ჰამასის და ჰეზბოლას ლიდერებიც.

მოგვიანებით, ცნობილი გახდა, რომ ინაუგურაციის დასრულების შემდეგ, თეირანში ჰამასის ლიდერი, ისმაილ ჰანიე მოკლეს.

ვრცლად ამ თემაზე: ჰამასი ადასტურებს, რომ მოკლულია მათი ლიდერი, ისმაილ ჰანიე