ამერიკის შეერთებული შტატების საიდუმლო სამსახურის ხელმძღვანელი, კიმბერლი ჩიტლი, თანამდებობიდან გადადგა, მიზეზი — დონალდ დრამპზე განხორციელებული თავდასხმაა, რომლის აღკვეთა მისმა უწყებამ ვერ შეძლო.

14 ივლისს მომხდარი თავდასხმის შემდეგ, აშშ-ის საიდუმლო სამსახური და მისი ხელმძღვანელი კრიტიკის ქვეშ მოექცნენ. ბევრი ფიქრობს, რომ უსაფრთხოების ზომები არ იყო საკმარისად დაცული.

კიმბერლი ჩიტლმა თანამშრომლებს მეილის საშუალებით აცნობა, რომ იღებს სრულ პასუხისმგებლობას მომხდართან დაკავშირებით და თანამდებობას ტოვებს.

"უკანასკნელ შემთხვევებთან დაკავშირებით, მე მძიმე გულით ვიღებ რთულ გადაწყვეტილებას, რომ გადავდგე, როგორც თქვენი დირექტორი", — განაცხადა ჩიტლმა.

აშშ-ის ყოფილი პრეზიდენტის, დონალდ ტრამპის მოკვლა 20 წლის კაცმა სცადა — იმ დროს, როდესაც რესპუბლიკელების სავარაუდო საპრეზიდენტო კანდიდატი მხარდამჭერებს ხვდებოდა.

თავდასხმამდე აქციის რამდენიმე მონაწილემ პოლიციას შეატყობინა, რომ ახალგაზრდა კაცი საეჭვოდ იქცეოდა და მაგნიტომეტრებთან ახლოს მოძრაობდა. ამის შესახებ თქვა სამართალდამცავი უწყების მაღალჩინოსანმა, რომელმაც ვინაობის გამხელა არ ისურვა.

მისი თქმით, პოლიციამ მისი პოვნა თავდასხმამდე ვერ შეძლო.

სროლის შედეგად დაიღუპა ერთი ადამიანი. მას შემდეგ გამომძიებლები ცდილობენ, მოიპოვონ მტკიცებულებები, რაც ნათელს გახდის, თუ რამ აიძულა პენსილვანიელი თომას მეთიუ კრუქსი, ასეთი თავდასხმა განეხორციელებინა.

უფრო მეტი ამ თემაზე: რა არის ცნობილი 20 წლის კაცზე, რომელიც დონალდ ტრამპს თავს დაესხა