რა არის ცნობილი 20 წლის კაცზე, რომელიც დონალდ ტრამპს თავს დაესხა
![](http://phoebe.on.ge/2024/07/15/Screenshot_2024-07-15_173250.jpg)
აშშ-ის ყოფილი პრეზიდენტის, დონალდ ტრამპის მოკვლა შაბათს 20 წლის კაცმა სცადა — იმ დროს, როდესაც რესპუბლიკელების სავარაუდო საპრეზიდენტო კანდიდატი მხარდამჭერებს ხვდებოდა.
თავდასხმამდე აქციის რამდენიმე მონაწილემ პოლიციას შეატყობინა, რომ ახალგაზრდა კაცი საეჭვოდ იქცეოდა და მაგნიტომეტრებთან ახლოს მოძრაობდა. ამის შესახებ თქვა სამართალდამცავი უწყების მაღალჩინოსანმა, რომელმაც ვინაობის გამხელა არ ისურვა.
მისი თქმით, პოლიციამ მისი პოვნა თავდასხმამდე ვერ შეძლო.
სროლის შედეგად დაიღუპა ერთი ადამიანი. მას შემდეგ გამომძიებლები ცდილობენ, მოიპოვონ მტკიცებულებები, რაც ნათელს გახდის, თუ რამ აიძულა პენსილვანიელი თომას მეთიუ კრუქსი, ასეთი თავდასხმა განეხორციელებინა.
გამოძიების ფედერალურმა ბიურომ (FBI) განაცხადა, რომ მომხდარს იძიებენ როგორც შიდა ტერორიზმის პოტენციურ აქტს, თუმცა იმის გამო, რომ საიდუმლო სამსახურის მიერ მოკლული კაცის მკაფიო იდეოლოგიური მოტივის შესახებ ცნობილი არაფერია, ბევრი შეთქმულების თეორია გაჩნდა.
"ყველას მოვუწოდებ, გთხოვთ, ნუ გააკეთებთ დასკვნებს მისი მოტივების, ან აფილაციების შესახებ", — თქვა პრეზიდენტმა ჯო ბაიდენმა კვირას. "მიეცით საშუალება FBI-ს, გააკეთოს თავისი საქმე. მე მივეცი მითითება, რომ ეს გამოძიება იყოს საფუძვლიანი და სწრაფი".
FBI მიიჩნევს, რომ კრუქსი, რომლის მანქანაში ბომბის დასამზადებლად საჭირო მასალები აღმოაჩინეს, მარტო მოქმედებდა. გამომძიებლებმა ვერ იპოვეს მუქარის შემცველი კომენტარები სოციალური მედიის ანგარიშებზე, ან — იდეოლოგიურ პოზიციებზე, რაც დაეხმარებოდა აეხსნათ, თუ რამ აიძულა მიზანში ტრამპის ამოღება.
ტრამპმა სოციალურ მედიაში თქვა, რომ სროლის შედეგად მარჯვენა ყურის ზედა ნაწილი დაუზიანდა. მოგვიანებით, მისმა მრჩევლებმა განმარტეს, რომ ყოფილი პრეზიდენტი თავს მხნედ გრძნობდა, მილუოკში რესპუბლიკელთა კონფერენციის წინ.
Crooks-ის ახლობლები მედიასთან საუბრისგან თავს იკავებენ. მისმა მამამ, მეთიუ კრუქსმა შაბათს გვიან განუცხადა CNN-ს, რომ ის ცდილობდა გაერკვია, რა ხდებოდა, თუმცა შვილზე არ ისაუბრებდა მანამ, ვიდრე სამართალდამცავებს არ გაესაუბრებოდა.
FBI-ის წარმომადგენელმა ჟურნალისტებს განუცხადა, რომ კრუქსის ოჯახი გამომძიებლებთან თანამშრომლობს.
ამასთან, ბიუროს ოფიციალურმა პირებმა კვირას თქვეს, რომ ისინი სწავლობენ თავდამსხმელის წარსულს და მის აქტივობას სოციალურ მედიაში, ასევე, მუშაობენ, რომ მოიპოვონ წვდომა მის ტელეფონზე.
კრუქსმა ბეთელ პარკის საშუალო სკოლა 2022 წელს დაამთავრა. სკოლის გამოსაშვები ცერემონიის ვიდეოზე, რომელიც ინტერნეტში გამოჩნდა, ჩანს, როგორ კვეთს სცენას დიპლომის მისაღებად. სკოლის ადმინისტრაციაში განაცხადეს, რომ ისინი სრულად ითანამშრომლებენ გამომძიებლებთან. Tribune-Review-ს მასალის თანახმად, კრუქსი იყო იმ რამდენიმე სტუდენტს შორის, რომელსაც მიენიჭა ჯილდო მათემატიკისა და მეცნიერებისთვის.
კრუქსმა, ასევე, სცადა ყოფილიყო სკოლის მსროლელთა გუნდში, თუმცა დაიწუნეს, რადგან ის ცუდი მსროლელი იყო.
ჯეისონ კოლერი, რომელიც იმავე სკოლაში სწავლობდა, იხსენებს, რომ კრუქსს ხშირად ჩაგრავდნენ, დასცინოდნენ სამოსის გამოც, რომელიც, ხშირად, სანადირო ფორმა იყო.
კრუქსი მოხუცებულთა თავშესაფარში მუშაობდა, კვების საკითხში დამხმარედ, მისი ძირითადი საქმიანობა საკვების მომზადება იყო. ორგანიზაციაში ამბობენ, რომ სამსახურში მის აყვანამდე ახალგაზრდა კაცის წარსული შეამოწმეს და საეჭვო ვერაფერი ნახეს.
თავდასხმის შემდეგ, ქუჩა, სადაც კრუქსი ცხოვრობდა, პოლიციას ჰქონდა ბლოკირებული. ადგილი, სადაც მან ტრამპს ესროლა, სახლიდან 1 საათის სავალზეა.
კრუქსმა გამოიყენა იარაღი, რომელიც, პოლიციის ინფორმაციით, მისმა მამამ შეიძინა. სამართალდამცველებმა გუშინ არ იცოდნენ, ჰქონდა თუ არა შვილს მამისგან მის აღებაზე ნებართვა მიღებული.
სოციალურ მედიაში გამოქვეყნებულ ვიდეოში ჩანს კრუქსი, რომელსაც აცვია ნაცრისფერი მაისური, ამერიკული დროშით მარჯვენა მკლავზე. ის გაუნძრევლად წევს ქარხნის სახურავზე, მოედნის ჩრდილოეთით, სადაც ამომრჩეველთან ტრამპის შეხვედრა მიმდინარეობდა. მას ყოფილ პრეზიდენტამდე 150 მეტრი აშორებდა.
AP წერს, რომ მაისური, რომელიც თავდამსხმელს ეცვა, ცნობილი იუთუბ არხისაა, Demolition Ranch, რომელიც აქვეყნებს ხოლმე ვიდეოებს, როგორ ისვრიან ცეცხლსასროლი იარაღიდან სხვადასხვა ობიექტის მიმართულებით, მათ შორის — სამიზნეებად ადამიანის ფორმის მანეკენებსაც იყენებენ.
თავდასხმის შემდეგ დონალდ ტრამპმა განაცხადა, რომ გამოსვლის ტექსტი მთლიანად შეცვალა და მასში, კონკურენტის, ჯო ბაიდენის კრიტიკის ნაცვლად, მთლიანად ერთობის აუცილებლობაზე ისაუბრებს.
"გულწრფელად, ახლა სულ სხვა გამოსვლა იქნება. ეს არის ქვეყნის გაერთიანების შანსი. მე მომეცა ეს შანსი", — თქვა ტრამპმა.
ყოფილი პრეზიდენტი მილუოკიში რამდენიმე საათის წინ ჩავიდა, სადაც დაესწრება რესპუბლიკელების ყრილობას და ოფიციალურად იქნება წარდგენილი პარტიის კანდიდატად.
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
-
გადახედვა
-
გადახედვა
-
გადახედვა
-
გადახედვა
-
გადახედვა
-
კომენტარები