ნატოს სამიტის მეორე დღეს, ვაშინგტონში მოკავშირეები შეთანხმდნენ, რომ ფოკუსირებულები იქნებიან უკრაინისთვის გრძელვადიან მხარდაჭერაზე.

უკრაინა მიიღებს რამდენიმე ახალ საჰაერო თავდაცვის სისტემას, მათ შორის, ხუთ პატრიოტის სისტემას, რომლებიც, კიევის თქმით, სასიცოცხლოდ მნიშვნელოვანია მშვიდობიანი მოსახლეობის და კრიტიკული მნიშვნელობის მქონე სამოქალაქო ინფრასტრუქტურის დასაცავად.

მოკავშირეებმა, ასევე, განაცხადეს, რომ მომავალი წლისთვის უკრაინისთვის გამოყოფენ 43 მილიარდ ევროს და აღნიშნეს, რომ გააკეთებენ ყველაფერს, "რაც საჭიროა რუსეთის პრეზიდენტის, ვლადიმირ პუტინის დასამარცხებლად".

გაერთიანებული სერვისების სამეფო ინსტიტუტის უფროსმა მკვლევარმა ევროპული უსაფრთხოების საკითხებში, ედ არნოლდსმა ევრონიუსთან თქვა, რომ პატრიოტის სისტემების მიღება საკმაოდ მნიშვნელოვანია იმ თვალსაზრისით, რომ მათ შეუძლიათ ჰიპერბგერითი რაკეტების განეიტრალება, რაც ყველაზე მეტად აზიანებს უკრაინის სამოქალაქო და კრიტიკულ ინფრასტრუქტურას.

"F-16-ებიც ძალიან ღირებული იქნება უკრაინისთვის, თუმცა არ შეიძლება განვიხილოთ თამაშის შემცვლელად. F-16-ები არ მისცემს საშუალებას უკრაინელებს, დაიბრუნონ დიდი ტერიტორიები უახლოეს მომავალში", — განუცხადა არნოლდმა Euronews-ს.

ბევრი სამხედრო ექსპერტი, მათ შორის, ნატოს ოფიციალური პირები, აღნიშნავენ, რომ რუსეთის ეკონომიკა ომის ეკონომიკად იქცა, ეს პროცესი კი, სავარაუდოდ, რამდენიმე წლის განმავლობაში გაგრძელდება. იარაღის წარმოებასა და თავდაცვის ინდუსტრიის განვითარებაზე სრული კონცენტრაცია ალიანსის დიდ შეშფოთებას იწვევს.

ბოლო თვეების განმავლობაში, უკრაინა სტრატეგიულად მნიშვნელოვანი ტერიტორიისთვის იბრძვის, ხარკოვის ჩრდილოეთით და ჩრდილო-აღმოსავლეთით.

ორშაბათს, სამიტის პარალელურად, რუსეთმა უკრაინაში რამდენიმე მნიშვნელოვანი თავდასხმა განახორციელა — მათ შორის, დარტყმა კიევის ბავშვთა საავადმყოფოზე, რომელსაც 27 მშვიდობიანი მოქალაქის დაღუპვა მოჰყვა, მათგან ოთხი ბავშვია.

ნატოს რამდენიმე წყარომ განაცხადა, რომ ჰოსპიტალზე თავდასხმა იყო პუტინის გზავნილი, შეხვედრის წინ.