სერიალ Big Little Lies ვარსკვლავი, ოსკაროსანი მსახიობი ნიკოლ კიდმანი ამბობს, რომ ტელევიზიას ახლა დიდებული პერიოდი აქვს, რის გამოც მზად არის ნებისმიერი საინტერესო შეთავაზება განიხილოს და თუ მოეწონება დათანხმდეს კიდეც.

კიდმანმა ბოლო ერთ წელში ორ სერიალში მიიღო მონაწილეობა, ზემოთ ხსენებული HBO-ს წარმატებული დრამის გარდა, მან ჯეინ კამპიონის შოუში Top of the Lake: China Girl ერთ-ერთი მთავარი როლი შეასრულა.

კიდმანმა ერთ-ერთ სატელევიზიო შოუში სტუმრობის დროს აღნიშნა, რომ ორივე სერიალში, მთავარი პერსონაჟები ქალები იყვნენ, რაც კინოში დიდი იშვიათობაა.

"ძალიან ბედნიერი ვარ ამ ორი სატელევიზიო შოუთი, ბედნიერი ვარ, რომ ასეთი ქალების გვერდით მომიწია დგომა. იცით, რაღაც შეიცვალა, კინოში ქალისთვის ამდენი როლი არ მოიძებნება და მივხვდი, რომ ტელევიზია არის ზუსტად ის ადგილი, სადაც ჩვენ საჭირო ხალხი ვართ. დიახ, ტელევიზიაში ჩვენთვის არის როლები და თუ მკითხავთ, მსურს თუ არა უფრო მეტ სერიალში მონაწილეობა და უფრო მეტი როლი ტელევიზიაში, გიპასუხებთ, რომ დიახ, რა თქმა უნდა", ამბობს კიდმანი.

ამავდროულად ოსკაროსანი მსახიობი აღნიშნავს, რომ სურს საკუთარი ძალები კომედიაშიც მოსინჯოს.

"ძალიან მინდა კომედიაში მომცენ როლი. მთელი ჩემი კარიერა დრამატული პერსონაჟებით არის სავსე. ახლა კი მსურს განსხვავებული ამპლუა მოვირგო. მით უმეტეს, რომ კომედიებში სათამაშოდ სახლში ერთი არაჩვეულებრივი, 9 წლის გოგო მყავს, რომელიც ჩემი ინსპირაციაა. მისგან უამრავ რამეს ვსწავლობს", ყვება კიდმანი.

ასე რომ ვნახოთ, სულ მალე შესაძლოა კიდმანი კომედიური ჟანრის სერიალში ან ფილმში ვიხილოთ, მანამდე კი ის ემის 2017-ის ერთ-ერთი ფავორიტია HBO-ს სერიალში შესრულებული როლისთვის და კრიტიკოსებიც სწორედ მას უწინასწარმეტყველებენ გამარჯვებას.