საქართველოს 23 არასამთავრობო ორგანიზაცია, ერთობლივი განცხადებით, კიდევ ერთხელ მოუწოდებს საქართველოს მთავრობას, გაიწვიოს რუსული კანონი, არ აღუდგეს წინ საქართველოს მოქალაქეების უდიდესი უმრავლესობის ნებას, გახდეს ევროპული ოჯახის წევრი და შეასრულოს ევროკომისიის მიერ განსაზღვრული 9 ნაბიჯი.

განცხადების მიხედვით, 27 ივნისს გამართულმა ევროპულმა საბჭომ, რომელიც ევროკავშირის 27 წევრი ქვეყნის ლიდერს აერთიანებს, საქართველოში ბოლო პერიოდში განვითარებულ მოვლენებსა და დემოკრატიულ რეგრესზე "სერიოზული წუხილი გამოხტა".

"ევროკავშირის წევრი ქვეყნების ლიდერების შეფასებით, რუსული კანონის მიღება გასულ წელს ევროკომისიის მიერ საქართველოსთვის მიცემული 9 ნაბიჯის შესრულების პროცესში ცალსახა უკუსვლაა. 9 ნაბიჯის შესრულება ევროპული ღირებულებებისადმი ერთგულებასთან ერთად, ევროპულ კავშირში გაწევრიანების მოლაპარაკებების დაწყების წინაპირობას წარმოადგენს", — წერენ არასამთავროები.

მათივე თქმით, ევროპულმა საბჭომ საქართველოს ხელისუფლებას მოუწოდა, სიცხადე შეიტანოს თავის განზრახვებში აღებული კურსის შეცვლის გზით, რაკი ეს საფრთხის წინაშე აყენებს საქართველოს ევროკავშირისკენ მიმავალ გზას და "გაწევრიანების პროცესის დე ფაქტო შეჩერებას გამოიწვევს":

"ამასთან, ევროპულმა საბჭომ ხელისუფლებას მოუწოდა, 2024 წლის შემოდგომაზე უზრუნველყოს თავისუფალი და სამართლიანი არჩევნების ჩატარება და დაასრულოს სამოქალაქო საზოგადოების წარმომადგენლების, პოლიტიკური ლიდერების, სამოქალაქო აქტივისტებისა და ჟურნალისტების მიმართ წარმოებული ფიზიკური თავდასხმები, დაშინებები და მუქარა".

ხელმომწერი ორგანიზაციების მიხედვით, ევროკომისია შემოდგომაზე წარმოადგენს გაფართოების მორიგ ანგარიშს, რომელშიც სხვა საკითხებთან ერთად შეფასებული იქნება საქართველოს მიერ ევროკომისიის მხრიდან განსაზღვრული 9 ნაბიჯის შესრულება.

"საქართველოს ევროკავშირში გაწევრიანების პროცესის გაყინვის საფრთხე რეალურია, რასაც ასევე ადასტურებს ევროკავშირისა და მისი წევრი-სახელმწიფოების მაღალი თანამდებობის პირთა მიერ გაკეთებული განცხადებები. აღნიშნულის შემთხვევაში, ევროპული კავშირის ამ გადაწყვეტილებაზე პასუხისმგებლობა სრულად ეკისრება საქართველოს ხელისუფლებას", — წერია განცხადებაში.

განცხადებას ხელს აწერენ:

  • საქართველოს რეფორმების ასოციაცია (GRASS)
  • აღმოსავლეთევროპული ცენტრი მრავალპარტიული დემოკრატიისთვის
  • დემოკრატიის კვლევის ინსტიტუტი (DRI)
  • დემოკრატიის მცველები
  • ეკონომიკური პოლიტიკის კვლევის ცენტრი
  • თბილისი პრაიდი
  • ინფორმაციის თავისუფლების განვითარების ინსტიტუტი
  • მწვანე ალტერნატივა
  • სამართლიანი არჩევნები (ISFED)
  • სამოქალაქო საზოგადოების ფონდი
  • სასამართლოს გუშაგი
  • საფარი
  • საქართველოს ახალგაზრდა იურისტთა ასოციაცია (საია)
  • საქართველოს დემოკრატიული ინიციატივა (GDI)
  • საქართველოს ევროპული ორბიტა
  • საქართველოს მომავლის აკადემია
  • სოციალური სამართლიანობის ცენტრი
  • ტოლერანტობისა და მრავალფეროვნების ინსტიტუტი
  • უფლებები საქართველო
  • ქალთა ინიციატივების მხარდამჭერი ჯგუფი
  • წამების მსხვერპლთა ფსიქოსოციალური და სამედიცინო რეაბილიტაციის ცენტრი
  • საბჭოთა წარსულის კვლევის ლაბორატორია
  • საერთაშორისო გამჭვირვალობა — საქართველო