ცნობილი ამერიკელი მსახიობის, მეთ ბომერის თქმით, თავისი სექსუალური ორიენტაციის გამო ფოლადის კაცის როლი დაკარგა. ფილმში Superman: Flyby, რომელიც ეკრანებზე 2000-იანების დასაწყისში უნდა გამოსულიყო, ბომერი მთავარ როლზე განიხილებოდა და რეჟისორ ბრეტ რეტნერის რჩეული იყო. თუმცა, ჯერ კიდევ პროექტის დახურვამდე, კინოსტუდიამ ბომერის როლზე დამტკიცება არ მოისურვა, მოგვიანებით კი, რეტნერმაც დატოვა რეჟისორის სკამი.

"მივედი სუპერმენის ქასთინგზე, რომელიც ერთ თვეს გაგრძელდა. ჩანდა, რომ რეჟისორის რჩეული მე ვიყავი", — იხსენებს ბომერი The Hollywood Reporter-ის პოდკასტში.

მსახიობს ჰკითხეს, იყო თუ არა როლზე არდამტკიცების მიზეზი მისი სექსუალური იდენტობა.

"კი, მე ასე გავიგე", — უპასუხა ბომერმა, რომელიც 2012 წელს გეიდ დაქამინგაუთდა, — "იმ დროისთვის კინოინდუსტრიაში ასეთ რამეს ჯერ კიდევ იყენებდნენ შენ წინააღმდეგ. როგორ, რატომ და ვინ — არ ვიცი, მაგრამ მე ასე აღვიქვი".

სხვათა შორის, 2012 წელს მწერალმა ჯეკი კოლინზმაც თქვა, რომ მეთ ბომერმა სუპერმენის როლი სწორედ მისი სექსუალობის გამო დაკარგა. მაშინ მედიაში ერთ-ერთმა წყარომ აღნიშნა, რომ კოლინზის განცხადება არასწორი იყო და ბომერმა როლი, რეალურად, რეჟისორის პროექტიდან წასვლის გამო ვეღარ მიიღო. გავრცელებული ცნობით, კინოსტუდიას სურდა, სუპერმენი უფრო ცნობილ მსახიობს განესახიერებინა; პროექტის დახურვამდე როლზე განიხილებოდნენ ბრენდან ფრეიზერი, ჯოშ ჰარტნეტი და პოლ უოკერიც.

ბომერს კი, რომელმაც, საბოლოოდ, სუპერმენი 2013 წლის ანიმაციაში გაახმოვანა, წინათაც აღუნიშნავს, რომ ქამინგ აუთის გამო როლები დაკარგა. მსახიობის თქმით, დაქამინგაუთება თავისი კარიერის მნიშვნელოვან მომენტში გადაწყვიტა — მაშინ, როცა გადაწყვეტილების რისკებს თავადაც კარგად იაზრებდა.

"მაშინ [ჩემი] ერთ-ერთი ფილმი და სერიალი გამოდიოდა", — იხსენებს ბომერი, — "მაგრამ ჩემთვის მნიშვნელოვანი იყო, ნამდვილი ვყოფილიყავი, როგორც საკუთარ თავთან, ისე ჩემს ოჯახთან".

ბომერის თქმით, გადაწყვეტილება არასდროს უნანია, მაგრამ მას შემდეგ გზის გავლაც არ ყოფილა ადვილი.

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...