მოკლედ: დემოკრატიის კვლევის ინსტიტუტი (DRI) აცხადებს, რომ სახელმწიფო უსაფრთხოების სამსახურის 2023 წლის საქმიანობის ანგარიში შაბლონური და ზოგადია.

  • DRI-ის შეფასებით, დოკუმენტის "უკიდურესად მწირი, კონკრეტიკისგან დაცლილი შინაარსი", საზოგადოებას ვერ შეუქმნის რეალურ წარმოდგენას სამსახურის საქმიანობასთან დაკავშირებით.
  • ასევე, ანგარიში საქართველოს პარლამენტს ვერ მიაწვდის იმ მოცულობის ინფორმაციას, რაც მას სუს-ზე დემოკრატიული საპარლამენტო კონტროლისთვის სჭირდება.

დეტალები: DRI-ის ინფორმაციით, სუს-ის წლიური ანგარიში რამდენიმე თავისგან შედგება: "წინა წლების მსგავსად, დოკუმენტში ქვეყნისთვის მომდინარე საფრთხეებზე ვრცლად არის საუბარი, თუმცა, ძირითადად, ყოველგვარი კონკრეტიკის გარეშე", — წერს DRI.

  • მათივე თქმით, დოკუმენტის ძირითად ხარვეზს წარმოადგენს ის, რომ ანგარიშში არაა მითითებული, რაში გამოიხატება და საიდან მომდინარეობს საფრთხე, რა ქმედებები განახორციელა სამსახურმა ამგვარ საფრთხეებზე რეაგირებისთვის და რამდენად ეფექტიანი იყო მისი ქმედებები.
  • დოკუმენტი შემოიფარგლება ისეთი უკიდურესად ზოგადი ფრაზებით, როგორებიცაა: "სხვადასხვა შიდა და გარე აქტორები", "უცხო ქვეყნების ცალკეული დესტრუქციული ძალები", გატარდა "სათანადო" ან "კომპლექსური" ღონისძიებები.
  • ანგარიშის მიხედვით, "ადგილი ჰქონდა სხვადასხვა გარე და შიდა აქტორების მიერ საქართველოში პოლიტიკური ვითარების გამწვავებისა და ხელისუფლების ძალადობრივი გზით ცვლილებისთვის ნიადაგის მომზადებისა და რესურსების მობილიზების მცდელობებს", თუმცა, DRI-ის თმით, სხვა კონკრეტული ინფორმაცია ანგარიშში მოცემული არ არის.

დემოკრატიის კვლევის ინსტიტუტი წერს, რომ 2023 წლის საქმიანობის ანგარიში ფაქტობრივად იმეორებს 2022 წლის ანგარიშის ძირითად საკითხებს.

  • ანგარიშში უსაფრთხოების ძირითად პრობლემებს შორის რუსული ოკუპაცია და ქვეყნის ოკუპირებულ ტერიტორიებზე უკანონოდ განთავსებული რუსეთის სამხედრო ბაზებია მითითებული: "თუმცა, რუსეთიდან მომდინარე საფრთხეებზე საუბარია მხოლოდ ანგარიშის იმ ნაწილში, რომელიც ოკუპირებულ ტერიტორიებს უკავშირდება".

DRI-ის შეფასებით, სუს-ის 2022 წლის ანგარიშებისგან განსხვავებით, 2023 წლის ანგარიშში კორუფციის წინააღმდეგ ბრძოლის ქვეთავი ნაკლებად ინფორმაციულია.

  • "წლიური ანგარიში მცირედ წარმოდგენასაც არ გვიქმნის უსაფრთხოების სამსახურზე საპარლამენტო კონტროლის განხორციელებასთან დაკავშირებით. დოკუმენტში მოცემულია მხოლოდ სტატისტიკური ინფორმაცია, კონტროლის შინაარსობრივი ნაწილი კი — ბუნდოვანია", — წერს DRI.
  • მათივე თქმით, სუს-ის ანგარიშის ანალიზი კიდევ ერთხელ ამყარებს მოსაზრებას, რომ უწყების რესურსი არარაციონალურად იხარჯება და მისი ინტერესი მიპყრობილია არა რეალური საფრთხეების იდენტიფიცირებისა და მათ წინააღმდეგ ბრძოლის, არამედ კონკრეტული პოლიტიკური ჯგუფებისა და საზოგადოებრივი ორგანიზაციების დისკრედიტაციისაკენ.

ამ თემაზე: DRI-ის შეფასებით, სახელმწიფო უსაფრთხოების სამსახური საბიუჯეტო და ადამიანურ რესურსებს არარაციონალურად ხარჯავს

ბოლო ხაზი: დღეს, 12 ივნისს, საქართველოს პარლამენტი სახელმწიფო უსაფრთხოების სამსახურის ყოველწლიურ ანგარიშს სამი კომიტეტის გაერთიანებულ სხდომაზე მოისმენს.

  • DRI-ის ინფორმაციით, ანგარიშს "საქართველოს პარლამენტის რეგლამენტის დარღვევით", სამსახურის უფროსის გრიგოლ ლილუაშვილის ნაცვლად, კვლავ მისი პირველი მოადგილე ალექსი ბატიაშვილი წარადგენს.