მოკლედ: პრორუსული და ძალადობრივი ჯგუფი ალტ-ინფო, პარტია პატრიოტთა ალიანსის დახმარებით, 2024 წლის საპარლამენტო არჩევნებში მონაწილეობას მიიღებს.

  • ამის შესახებ განაცხადა ზურა მახარაძემ, ალტ-ინფოს ერთ-ერთმა ლიდერმა.

დეტალები: მახარაძის თქმით, ალტ-ინფოს და პატრიოტთა ალიანსს შორის შეთანხმება უკვე მიღწეულია და მოლაპარაკებები მიმდინარეობს სხვა კონსერვატიულ ძალებთანაც.

  • "კონსერვატიულ ფლანგზე, ერთადერთი პარტია, რომელთანაც იდეოლოგიურადაც გვაქვს თანხვედრა, არის პატრიოტთა ალიანსი, რომელიც ახლა არის საპარლამენტო პარტია.
  • მიუხედავად იმისა, რომ ნაწილი გამოეყო და ცალკეა, იურიდიულად საპარლამენტო პარტიაა და არაფრის შეგროვება არ სჭირდება, არც ხელმოწერების. უკვე იღებს არჩევნებში მონაწილეობას და მისი დაბლოკვაც შეუძლებელია", — განაცხადა მახარაძემ.

კონტექსტი: საჯარო რეესტრმა ძალადობრივი და პრორუსული პარტია კონსერვატიული მოძრაობა 8 აპრილს გააუქმა.

  • რეესტრის ეროვნული სააგენტოს გადაწყვეტილებაში ნათქვამია, რომ წარმოება დაიწყეს ანტიკორუფციული ბიუროს მოთხოვნის საფუძველზე, შეესწავლათ პარტიის რეგისტრაციის კანონიერება.
  • მანამდე ცნობილი იყო, რომ 2024 წლის არჩევნებში რეგისტრაციის მიზნით, კონსერვატიული მოძრაობა/ალტ ინფომ ცესკოს 50 608 ხელმოწერა წარუდგინა 2024 წლის 3 აპრილს.

13 აპრილს ალტ-ინფომ ქართული ოცნების ოფისთან აქცია გამართა. ისინი აპროტესტებენ საჯარო რეესტრის გადაწყვეტილებას.

  • აქციაზე ზურა მახარაძემ განაცხადა, რომ ლევან ჩაჩუამ, პარტია ქართული იდეის თავმჯდომარემ, მათ პარტია აჩუქა.

26 აპრილს, ზურა მახარაძემ ფეისბუქზე დაწერა, რომ საჯარო რეესტრმა მათი ახალი პარტიის, ქართული იდეის გაუქმების პროცესი დაიწყო.