მოკლედ: თბილისში, ქართული ოცნების ოფისთან ძალადობრივი და პრორუსული კონსერვატიული მოძრაობა/ალტ ინფო აქციას მართავს.

  • ისინი აპროტესტებენ საჯარო რეესტრის გადაწყვეტილებას, რომლის მიხედვით, 8 აპრილს, პარტია კონსერვატიული მოძრაობა გაუქმდა.

დეტალები: ალტ-ინფოს ერთ-ერთი ლიდერის, ზურაბ მახარაძის თქმით, საქართველოში ყველას აქვს სიტყვის, გამოხატვის და პოლიტიკაში მონაწილეობის უფლება, კონსერვატიული ფლანგის გარდა.

აქციაზე შეკრებილები პარტია ქართული ოცნების დროშებს წვავენ. ოფისთან მობილიზებულია პოლიციაც.

  • "ოცნებამ დასვა კითხვა, ვართ თუ არა ჩვენ პარტია, დასვა კითხვა, არსებობს თუ არა კონსერვატიული მოძრაობა. აი, აქ ვართ ჩვენ, შემოგვხედეთ, ვარსებობთ თუ არა?! თუ ამ ხალხს არ აქვს უფლება, ერქვას პარტია, მაშინ ვის აქვს ამის უფლება?", — თქვა ალტ-ინფოს ერთ-ერთმა ლიდერმა, შოთა მარტინენკომ.

ბოლო ხაზი: საჯარო რეესტრმა ძალადობრივი და პრორუსული პარტია კონსერვატიული მოძრაობა 8 აპრილს გააუქმა.

  • რეესტრის ეროვნული სააგენტოს გადაწყვეტილებაში ნათქვამია, რომ წარმოება დაიწყეს ანტიკორუფციული ბიუროს მოთხოვნის საფუძველზე, შეესწავლათ პარტიის რეგისტრაციის კანონიერება.
  • მანამდე ცნობილი იყო, რომ 2024 წლის არჩევნებში რეგისტრაციის მიზნით, კონსერვატიული მოძრაობა/ალტ ინფომ ცესკოს 50 608 ხელმოწერა წარუდგინა 2024 წლის 3 აპრილს.
  • ცესკომ განაცხადა, რომ "პარტიების საარჩევნო რეგისტრაციას არეგულირებს კანონი და დარეგისტრირდება ყველა, ვინც გაივლის კანონის მიერ დაწესებულ მოთხოვნებს."