მოკლედ: კონსერვატიული მოძრაობა/ალტ-ინფოს ერთ-ერთი ლიდერის ზურა მახარაძის განცხადებით, ლევან ჩაჩუამ, პარტია ქართული იდეის თავმჯდომარემ, მათ პარტია აჩუქა.

  • პარტიის ჩუქება მას შემდეგ მოხდა, რაც საჯარო რეესტრმა ჰომოფობიური და ძალადობრივი პარტია კონსერვატიული მოძრაობა გააუქმა.

დეტალები: ალტ-ინფოს ერთ-ერთმა ლიდერმა კონსტანტინე მორგოშიამ ტელეკომპანია პირველს უთხრა, რომ უახლოეს დღეებში პარტიის ყრილობა გაიმართება, სადაც პარტიის სახელის შეცვლაზე და ახალი თავმჯდომარის არჩევაზე იმსჯელებენ.

  • "პარტია არ არის ჩანაწერი რეესტრში, პარტია ხალხის ერთობაა. ვინმეს თუ ფორმალობებზე აქვს ინტერესი, ბატონმა ლევან ჩაჩუამ და მისმა თანამებრძოლებმა მოგვცეს, გვაჩუქეს თავისი პარტია. ამ პარტიას წინა არჩევნებში მონაწილეობა აქვს მიღებული, ამიტომ არაფერი არ იქნება", — განაცხადა ზურა მახარაძემ.

რა ვიცით ქართულ იდეაზე: ისევე როგორც კონსერვატიული მოძრაობა/ალტ ინფო, პარტია ქართული იდეა ჰომოფობიური და ანტიდასავლური გზავნილების მატარებელია. ამის შესახებ საუბარია ISFED-ის კვლევაში.

საზოგადოებრივი მოძრაობა ქართული იდეა საჯარო რეესტრში 2014 წლის 6 ნოემბერს დარეგისტრირდა.

ფოტო: საჯარო რეესტრი

  • საქართველოში მოქმედი პოლიტიკური პარტიების შემოწირულებების მიხედვით, პარტიისთვის 2016 წლამდე და 2016 წლის შემდეგ, თანხა არავის შეუწირავს.
  • ჯამში, 2016 წელს, პარტიის შემოწირულება 14 459 ლარი იყო.

ბოლო ხაზი: დღეს, თბილისში, ქართული ოცნების ოფისთან ძალადობრივმა და პრორუსულმა კონსერვატიულმა მოძრაობა/ალტ-ინფომ აქცია გამართა.

  • ისინი აპროტესტებენ საჯარო რეესტრის გადაწყვეტილებას, რომლის მიხედვით, 8 აპრილს, პარტია კონსერვატიული მოძრაობა გაუქმდა.
  • აქციაზე შეკრებილებმა პარტია ქართული ოცნების დროშები დაწვეს.

საჯარო რეესტრმა ძალადობრივი და პრორუსული პარტია კონსერვატიული მოძრაობა 8 აპრილს გააუქმა.

  • რეესტრის ეროვნული სააგენტოს გადაწყვეტილებაში ნათქვამია, რომ წარმოება დაიწყეს ანტიკორუფციული ბიუროს მოთხოვნის საფუძველზე, შეესწავლათ პარტიის რეგისტრაციის კანონიერება.
  • მანამდე ცნობილი იყო, რომ 2024 წლის არჩევნებში რეგისტრაციის მიზნით, კონსერვატიული მოძრაობა/ალტ ინფომ ცესკოს 50 608 ხელმოწერა წარუდგინა 2024 წლის 3 აპრილს.