რა ხდება: საჯარო რეესტრის თანახმად, კონსერვატიული მოძრაობა/ალტ ინფო გაუქმებულია.

• ინფორმაცია ასევე დაადასტურა ძალადობრივმა, პრორუსულმა პარტიამ.
• "ხელისუფლების დავალებით, საჯარო რეესტრმა ოფიციალურად გამოგვიცხადა, რომ ჩვენი პარტია, რომელიც წლების განამავლობაში დარეგისტრირებული იყო და არსებობდა, გააუქმა", — განაცხადა ალტ ინფოს პირდაპირ ეთერში გიორგი ქარდავამ, ძალადობრივი, პრორუსული პარტიის ერთ-ერთმა ლიდერმა.

რა გახდა საფუძველი: საჯარო რეესტრის ეროვნული სააგენტოს გადაწყვეტილებაში ნათქვამია, რომ წარმოება დაიწყეს ანტიკორუფციული ბიუროს მოთხოვნის საფუძველზე, შეესწავლათ პარტიის რეგისტრაციის კანონიერება.

შესწავლისას რეესტრმა გამოავლინა, რომ

• ყრილობის ოქმის მიხედვით, მოქალაქეთა პოლიტიკური გაერთიანების გენერალურ მდივნად
  (ხელმძღვანელ პირად) არჩეულ იქნა გიორგი ქარდავა, რომელიც ხელს არ აწერდა წარდგენილ
  განცხადებას, იმის მიუხედავად, რომ კანონით განსაზღვრულია ხელმძღვანელი პირის ხელმოწერილი განცხადების წარდგენის ვალდებულება.
• წესდებას ხელს აწერდა მხოლოდ ყრილობის თავმჯდომარე, თუმცა მასზე უნდა ყოფილიყო ყრილობის ყველა წევრის ხელმოწერა.
• სარეგისტრაციოდ წარდგენილი მოქალაქეთა პოლიტიკური გაერთიანების წევრთა სია არ შეიცავდა წევრთა პირადობის მოწმობის ნომრების შესახებ ინფორმაციას.
• სარეგისტრაციოდ წარდგენილ წესდებასა და თანდართულ დოკუმენტებში მოქალაქეთა პოლიტიკური გაერთიანების სახელწოდება მითითებული იყო არაერთგვაროვნად.
• სარეგისტრაციოდ წარდგენილი ემბლემის ესკიზი არ შეესაბამებოდა მოქალაქეთა პოლიტიკური
  გაერთიანების წესდებით განსაზღვრულ აღწერილობას.
• სარეგისტრაციოდ წარდგენილი წესდებით, პარტიის წევრთა ყრილობა არ იყო განსაზღვრული
  ხელმძღვანელ ორგანოდ. ასევე, სარევიზიო კომისია წესდების შესაბამის მუხლებში
  არაერთგვაროვნად იყო მოხსენიებული.
• სარეგისტრაციოდ წარდგენილი წესდება პარტიის ქონების გამოყენების წესს არ ითვალისწინებდა.

კონსერვატიული მოძრაობა ცესკოში რეგისტრაციას ითხოვდა: მანამდე ცნობილი იყო, რომ 2024 წლის არჩევნებში რეგისტრაციის მიზნით, კონსერვატიული მოძრაობა/ალტ ინფომ ცესკოს 50 608 ხელმოწერა წარუდგინა 2024 წლის 3 აპრილს.

• ცესკომ განაცხადა, რომ "პარტიების საარჩევნო რეგისტრაციას არეგულირებს კანონი და დარეგისტრირდება ყველა, ვინც გაივლის კანონის მიერ დაწესებულ მოთხოვნებს."

ასევე, უწყებამ თქვა, რომ საარჩევნო სუბიექტის რეგისტრაციისთვის კანონი ადგენს 10-დღიან ვადას, შემდეგ კი გახდებოდა ცნობილი, მიანიჭებდა თუ არა კონსერვატიულ მოძრაობას საპარლამენტო არჩევნებში მონაწილეობის უფლებას.

ბოლო ხაზი: პრორუსულმა, ჰომოფობიურმა და ძალადობრივმა პარტიამ, კონსერვატიულმა მოძრაობამ, 2024 წლის საპარლამენტო არჩევნებისთვის მზადება ერთი წლით ადრე, 2023 წლის ოქტომბერში დაიწყო. 2023 წლის ოქტომბერში ჩავიდა შვიდ ქალაქში — თელავში, გორში, ქუთაისში, რუსთავში, მცხეთაში, ბათუმსა და ზუგდიდში. პირველი შეხვედრა თელავში, ვაჟა ფშაველას სახელობის სახელმწიფო პროფესიულ დრამატულ თეატრში ჩატარდა, რომელიც სახელმწიფო ბიუჯეტიდან ფინანსდება.

არქივიდან: როგორ ემზადება ღიად პრორუსული "კონსერვატიული მოძრაობა" 2024 წლის არჩევნებისთვის — კვლევა