მოკლედ: მას შემდეგ, რაც გუშინ, 14 მაისს, საპარლამენტო უმრავლესობამ საბოლოოდ მიიღო რუსული კანონი და ამავდროულად, პროტესტის გამოსახატად რუსთაველის გამზირზე გასული ათასობით მშვიდობიანი მოქალაქე საპოლიციო ძალების გამოყენებით დაშალა და დააკავა 16 პირი, დემონსტრანტები დღეს, 15 მაისსაც მივლენ საკანონმდებლო ორგანოს შენობის წინ.

  • დაგეგმილია საპროტესტო მარშები სტუდენტების მონაწილეობითაც.

ფონი: რუსული კანონის საწინააღმდეგო საპროტესტო აქციები უკვე ერთი თვეა, უწყვეტად მიმდინარეობს თბილისსა და საქართველოს სხვა დიდ ქალაქებში.

  • გაიფიცნენ და უწყვეტად გამოხატავენ პროტესტს სტუდენტების დიდი ნაწილი, ლექტორებიც.
  • ხელისუფლებასთან ბოიკოტის რეჟიმში გადავიდა ოპოზიციის დიდი ნაწილი.
  • საქართველოს სტრატეგიული პარტნიორები, ევროკავშირიდან და ამერიკის შეერთებული შტატებიდან, მკაფიო განცხადებებს აკეთებენ რუსული კანონის მიღების გამო, საქართველოსთან ურთიერთობის გადახედვის შესახებ.

ამ თემაზე:
• ბორელი — საქართველომ კანდიდატის სტატუსი მიიღო 9 ნაბიჯის შესრულების დათქმით. მოვუწოდებთ, გააუქმონ კანონი

• ბაიდენის პრესსპიკერი: თუ ამ კანონმდებლობას საბოლოოდ მიიღებენ, ეს გვაიძულებს, ფუნდამენტურად გადავაფასოთ ურთიერთობა საქართველოსთან

სახალხო პროტესტის გეგმა 15 მაისისთვის

  • 19:00 საათი — დაგეგმილია სტუდენტური საპროტესტო მარში: "სტუდენტები ვიკრიბებით ფილარმონიასთან და სპორტის სასახლესთან 15 მაისს, 19:00 საათზე, საიდანაც მსვლელობით გავემართებით გმირთა მოედანზე. ყველას მოგიწოდებთ, შემოგვიერთდეთ!", — წერია პროტესტის საორგანიზაციო გვერდზე.

  • 20:00 საათი — გაიმართება მსვლელობა, სახელწოდებით — შეაწუხე ვაკე: "დრო მოვიდა, ყველაზე ქოცურ უბანს მივაკითხოთ! 15 მაისს, 20:00ზე ვიკრიბებით ყველა ვაკის პარკთან და ვაწყობთ მსვლელობას ჭავჭავაძეზე და აბაშიძეზე, ვიკავებთ ორივე ქუჩას ერთდროულად და ვანახებთ, რამდენი ვართ", — აცხადებენ ორგანიზატორები.