მოკლედ: შინაგან საქმეთა სამინისტროს ინფორმაციით, დღეს, 14 მაისს, პარლამენტთან, რუსული კანონის საპროტესტო აქციაზე 13 პირი დააკავეს.

  • შსს აცხადებს, რომ მოქალაქეები დააკავა პოლიციელთა დაუმორჩილებლობისა და წვრილმანი ხულიგნობისთვის, ადმინისტრაციულ სამართალდარღვევათა კოდექსის 166-ე და 173-ე მუხლების საფუძველზე.

დეტალები: შსს იუწყება, რომ პარლამენტის მიერ რუსული კანონის საბოლოოდ მიღების შემდეგ აქციის მონაწილეებმა რუსთაველის გამზირზე, საკანონმდებლო ორგანოს შესასვლელში მოწყობილი რკინის დამცავი ღობის დაზიანება დაიწყეს, შეაღწიეს პარლამენტის ტერიტორიაზე და შენობაზე საღებავებით გააკეთეს სხვადასხვა სახის წარწერები.

  • "მიუხედავად პოლიციის არაერთი მოწოდებისა და შსს-ს არაერთი გამაფრთხილებელი განცხადებისა, რომ აქცია ჩაეტარებინათ მშვიდ ვითარებაში, აქციის მონაწილეები არ დაემორჩილნენ კანონიერ მოწოდებებს სიტყვიერად და ფიზიკურად უპირისპირდებოდნენ".

შსს-ს ვერსიით, აქციის მონაწილეები პოლიციის მიმართულებით ისროდნენ სხვადასხვა ბლაგვ საგნებსა და საღებავებს: "სამინისტრო შეისწავლის აქციის მსვლელობისას მომხდარ ყველა კანონსაწინააღმდეგო ფაქტს და თითოეულ ქმედებას მკაცრი სამართლებრივი რეაგირება მოჰყვება", — აცხადებს უწყება.

კონტექსტი: რუსული კანონის საბოლოოდ მიღების შემდეგ, ხელისუფლებამ სპეცრაზმის გამოყენებით, პარლამენტის მიმდებარე ტერიტორია, მათ შორის, რუსთაველის გამზირის ნაწილი, აქციის მონაწილეებისგან ძალის გამოყენებით გაწმინდა.

  • გამოიყენეს წიწაკის სპრეიც.

გაიგე მეტი: მოვუწოდებთ სპეციალური დანიშნულების რაზმის თანამშრომლებს, არ შეასრულონ უკანონო ბრძანებები — საია