იუსტიციის მინისტრის, თეა წულუკიანის განმარტებით, საკონსტიტუციო სასამართლოს რეფორმის შედეგად ერთიან ნაციონალურ მოძრაობას მასზე გავლენა ვეღარ ექნება:

"საკონსტიტუციო სასამართლოს კოლეგია, რომელშიც ვარძელაშვილი და კოპალეიშვილი არიან, არის ის კოლეგია, რომელიც პრაქტიკულად ერთი პოლიტიკური და მეგობრული ოჯახია ბატონ ნიკა გვარამიასთან".

ჟურნალისტის შეკითხვას, გასცემს თუ არა წულუკიანი ნიკა გვარამიას ბრალდებებს პასუხს, იუსტიციის მინისტრმა უპასუხა:

"მე არ მიმაჩნია ის სერიოზულ პერსონაჟად, მაგრამ თუ ის ჩემი იუსტიციის მინისტრობით არის უბედური, გამიხარდება, ეს ჩემთვის ძალიან დიდი კომპლიმენტია, რადგან ჩვენ 4 წლის განმავლობაში შევძელით ის, რაც მისი გუნდის 9 წლიანი მმართველობის პერიოდში ვერ გახდა შესაძლებელი. ეს არის შენება და მშენებლობა, პროცესი, პროგრესი კანონის ძალით".

იუსტიციის მინისტრმა ასევე განაცხადა, რომ კანონის შესაბამისად, მოსამართლეს, ამ შემთხვევაში ტურავას, მიეცა უფლება, რომ საქმე პლენუმმა განიხილოს, რომელიც უფრო მაღალი ლეგიტიმურობის ორგანოა და შესაბამისად, 2 და 3 მოსამართლის ხელში არ იქნება ქვეყნის ბედი:

"ა.გ. მიმაჩნია, რომ ყველა ის მნიშვნელოვანი ორგანული კანონი, რომელსაც პარლამენტი, ხალხის მიერ არჩეული ხალხი, იღებს, 2-მა და 3-მა მოსამართლემ არ უნდა ცნოს ანტიკონსტიტუციურად, ისინი უნდა ჩაითვალოს განსაკუთრებული მნიშვნელობის თემებად და კარგია თუ მათ პლენუმი განიხილავს".

საკონსტიტუციო სასამართლოს მოსამართლემ, მერაბ ტურავამ რუსთავი 2-ის საქმის სარჩელების განხილვის მოთხოვნით პლენუმს, საკონსტიტუციო სასამართლოს შესახებ კანონში შეტანილი ცვლილებების შესაბამისად, 7 ივნისს, მიმართა:

"მივმართავ საკონსტიტუციო სასამართლოს პლენუმს შპს სამაუწყებლო კომპანია რუსთავი 2-ისა და შპს ტელეკომპანია საქართველოს ზოგიერთი სარჩელის საკონსტიტუციო სასამართლოს პირველი კოლეგიიდან პლენუმისთვის გადაცემის და პლენუმის მიერ განხილვის თაობაზე".

აღსანიშნავია, რომ გიგი უგულავას საქმის 7 ივნისს დანიშნული სასამართლოს სხდომაც სწორედ საქმის სარჩელის პლენუმისადმი გადაცემის მიზეზით გადაიდო.

აღნიშნული გადაწყვეტილების მიღების საშუალება მოსამართლეებs მას შემდეგ მიეცათ, რაც საკონსტიტუციო სასამართლოს შესახებ კანონში შევიდა ერთ-ერთი ცვლილება, რომლის მიხედვითაც, ერთ მოსამართლეს შეუძლია კოლეგიაში საქმის განხილვის ნებისმიერ ეტაპზე საქმე პლენუმს გადასცეს განსახილველად.