მოკლედ: საქართველოს ეროვნული პლატფორმა მასწავლებელ ლადო აფხაზავაზე თავდასხმას, ინფორმაციის თავისუფლების განვითარების ინსტიტუტის (IDFI) დირექტორ გიორგი კლდიაშვილზე და ტელეკომპანია ფორმულას გადამღებ ჯგუფზე განხორციელებულ სიტყვიერ და ფიზიკურ ძალადობას გმობს.

დეტალები: პლატფორმა წერს, რომ მნიშვნელოვანია, უმოკლეს დროში, ძალადობის ფაქტებზე რეაგირება მოხდეს, კონკრეტულად, ჩატარდეს დროული და ყოველმხრივი გამოძიება, დამნაშავეები მიეცნენ პასუხისგებაში და გამოძიების შესახებ ინფორმაცია კი, მიეწოდოს საზოგადოებას.

  • "არა ძალადობას! არა რუსულ კანონს! კი ევროპას!", — წერია პლატფორმის განცხადებაში.

პლატფორმა მოუწოდებს

  • ქართულ ოცნებას: უარი თქვას რუსული კანონის მიღებაზე, რომელიც საქართველოს საზოგადოებას ყოფს და ძალადობასაც კი იწვევს, ხოლო საქართველოს ევროკავშირსა და ევროატლანტიკური ალიანსისკენ მიმავალ გზას უჭრის.
  • შინაგან საქმეთა სამინისტროს და სპეციალურ საგამოძიებო სამსახურს: დროულად და ყოველმხრივ გამოიძიონ ძალადობის თითოეული ფაქტი და საზოგადოებას მიაწოდონ ინფორმაცია გამოძიების შედეგების შესახებ.

კონტექსტი: 7 მაისს, ფიზიკურად დაესხნენ თავს ინფორმაციის თავისუფლების განვითარების ინსტიტუტის (IDFI) აღმასრულებელ დირექტორს, გიორგი კლდიაშვილსა და ტელეკომპანია ფორმულას გადამღებ ჯგუფს.

  • ფიზიკური თავდასხმა, შვედეთის საელჩოსთან იმ დროს მოხდა, როდესაც ტელეარხი გიორგი კლდიაშვილთან სატელევიზიო კომენტარს წერდა.

მსგავსი: IDFI-ის დირექტორსა და ფორმულას გადამღებ ჯგუფს თავს დაესხნენ

  • 5 მაისს, ლანჩხუთში, ასევე ფიზიკურად დაესხნენ თავს მასწავლებლის ეროვნული ჯილდოს მფლობელს, ლადო აფხაზავას, საკუთარ სახლთან. აფხაზავას თქმით, თავდასხმის დროს, 20 წლის შვილთან ერთად იყო.
  • აფხაზავამ მედიასთან თქვა, რომ მასზე თავდასხმას, რუსული კანონის გაპროტესტებას და აქციებში მონაწილეობას უკავშირებს.

გაიგე მეტი: 700-ზე მეტი მასწავლებელი ლადო აფხაზავას სოლიდარობას უცხადებს

ბოლო ხაზი: საქართველოს ეროვნული პლატფორმა 185 ორგანიზაციას აერთიანებს.

  • ორგანიზაციების ჩამონათვალი ნახეთ ბმულზე.