მოკლედ: დემოკრატიის კვლევის ინსტიტუტი (DRI) ეხმიანება 2 მაისს, გმირთა მოედნის ტერიტორიაზე, აქციის მონაწილეებზე ორგანიზებული ჯგუფების თავდასხმას და წერს, რომ განსაკუთრებით თვალშისაცემია სამართალდამცავების უმოქმედობა ძალადობაზე.

  • DRI მოუწოდებს შინაგან საქმეთა სამინისტროს, რომ უზრუნველყოს აქციის მონაწილეთა უსაფრთხოება.
  • დაიწყოს გამოძიება გმირთა მოედნის მიმდებარე ტერიტორიაზე თავდასხმის ფაქტთან დაკავშირებით.

რა მოხდა: DRI-ის მიხედვით, ღამის 01:20 საათზე, გმირთა მოედნის ტერიტორიაზე, მშვიდობიანი აქციის მონაწილეებს, მოულოდნელად, ყოველგვარი პროვოცირების გარეშე, თავს დაესხა სამოქალაქო ტანსაცმელში ჩაცმული, ძლიერი ფიზიკური აღნაგობის მქონე 20-მდე ადამიანი, რომლებიც რამდენიმე მანქანით გადაადგილდებოდნენ.

  • თავდამსხმელები აქციის მონაწილეებს უმოწყალოდ ურტყამდნენ სახის არეში და სხეულის სხვადასხვა ნაწილში. ინციდენტს შეესწრნენ ბავშვებიც.
  • გავრცელებული კადრებიდან იდენტიფიცირებადია ორგანიზებული ძალადობრივი ჯგუფის წევრების ვინაობა. კარგად ჩანს მათი ავტოსატრანსპორტო საშუალებების ნომრებიც.
  • "თავდამსხმელთა შეთანხმებული მოქმედება ამყარებს ვარაუდს, რომ მოძალადეები იყვნენ წინასწარ ორგანიზებული ძალადობრივი ჯგუფის წევრები", — წერს DRI.

გაიგე მეტი: ცირკთან აქციის მონაწილეებს, უცნობი პირები, ფიზიკურად გაუსწორდნენ

დეტალები: დემოკრატიის კვლევის ინსტიტუტი აღნიშნავს, რომ ძალადობრივი თავდასხმის ადგილზე არ იყო არც ერთი საპატრულო ეკიპაჟი. სამართალდამცავები დანაშაულის ადგილზე არ გამოჩენილან არც ინციდენტის შემდეგ.

  • ამ დრომდე ორგანიზებული ძალადობა არ შეუფასებია შინაგან საქმეთა სამინისტროს.

DRI-ის შეფასებით, ქართული ოცნება, წლებია, მშვიდობიანი შეკრების მონაწილეების მოძალადეების პირისპირ შეტოვების პრაქტიკას ამკვიდრებს:

  • "მაშინ, როდესაც სამართალდამცავების ძირითადი რესურსი მშვიდობიანი აქციის მონაწილეთა წინააღმდეგ არის მიმართული, პოლიციის უმოქმედობა ორგანიზებული ჯგუფის მიერ ჩადენილ ძალადობაზე ხაზგასმით თვალშისაცემია".