მოკლედ: რუსული კანონის საპროტესტო აქციის მონაწილეების დარბევის პარალელურად, შინაგან საქმეთა სამინისტრო განცხადებას ავრცელებს და აცხადებს, რომ იწყებენ კანონმდებლობით გათვალისწინებული ღონისძიების განხორციელებას.

დეტალები: "გამომდინარე იქიდან რომ აქცია სრულად გასცდა კანონით დადგენილი შეკრება მანიფესტაციის ფარგლებს და გახდა ძალადობრივი, საზოგადოებრივი წესრიგის აღდგენის მიზნით შინაგან საქმეთა სამინისტრო იწყებს კანონმდებლობით გათვალისწინებული ღონისძიების განხორციელებას", — წერს შსს.

კონტექსტი: დღეს, 30 აპრილს, რუსული კანონის საპროტესტო აქცია მიმდინარეობს, სადაც სპეცრაზმი მშვიდობიანი აქციის მონაწილეებს, პარლამენტის მიმდებარე ტერიტორიაზე, ფიზიკურად უსწორდება.

პარლამენტის უკანა შესასვლელთან, შსს-მ მშვიდობიანი დემონსტრანტების წინააღმდეგ, რამდენჯერმე გამოიყენა სპეციალური საშუალებები, მათ შორის ცრემლსადენი გაზი და ე.წ. წიწაკის სპრეი.

  • არიან დაკავებულებიც.

ტელევიზიების მიერ გავრცელებულ კადრებში ჩანს, რომ მანიფესტანტების მისამართით დამიზნებით უშვებენ ცრემლსადენ გაზს.

  • ასევე, ტვ პირველის ინფორმაციით, პოლიციამ, სავარაუდოდ, ისროლა რეზინის ტყვიებიც.
  • მედიის ინფორმაციით, დაშავებულებს შორის არიან არასრულწლოვანებიც.
  • დარბევა რუსთაველის მიმდებარედ ყოველგვარი გაფრთხილების გარეშე დაიწყო.