Caucasus Heritage Watch-მა, კულტურული ძეგლების დამკვირვებელმა, განაცხადა, რომ წმინდა იოანე მკრტიჩის სახელობის ეკლესია აზერბაიჯანმა დაანგრია.

მათ გააანალიზეს სატელიტური სურათები, სადაც ჩანს, რომ ეკლესია მთლიანად განადგურდა 2023 წლის 28 დეკემბრიდან 2024 წლის 4 აპრილამდე პერიოდში.

წმინდა იოანე მკრტიჩის სახელობის ეკლესია

წმინდა იოანე მკრტიჩის სახელობის ეკლესია

ფოტო: Caucasus Heritage Watch

აზერბაიჯანს ადრეც ადანაშაულებდნენ მთიან ყარაბაღში ქრისტიანული სომხური მემკვიდრეობის განადგურებაში. 2020 წელს, მთიანი ყარაბაღის მეორე ომის დასრულების შემდეგ, აზერბაიჯანის ხელისუფლებამ ღიად დაადანაშაულა სომხები კავკასიური ალბანური ძეგლებისა და ეკლესიების მითვისებაში — ქრისტიანული სამეფოს, რომელიც არსებობდა სამხრეთ კავკასიაში პირველ ათასწლეულში.

"ომის შემდეგ, რუსეთის მართლმადიდებლური ეკლესიის ბაქოს ეპარქიამ გამოაცხადა პრეტენზია შენობაზე და აღდგენის პირობა დადო. მიუხედავად ამისა, ეკლესია გაქრა“, — აცხადებენ კავკასიის მემკვიდრეობის დაცვის ორგანიზაციაში.

გაეროს სასამართლომ დაავალა აზერბაიჯანს, მიეღო ყველა საჭირო ზომა, სომხურ კულტურულ მემკვიდრეობაზე, ვანდალიზმისა ფაქტების აღსაკვეთად და დამნაშავეების დასასჯელად.

Monument Watch, სომხური აკადემიური პლატფორმა, რომელიც ფოკუსირებულია მთიანი ყარაბაღის კულტურულ მემკვიდრეობაზე, აცხადებს, რომ ეკლესია იოჰანეს და ბაბა სტეპანიან ჰოვნანენტებმა გარდაცვლილი ძმის, მკრტიჩის სახელზე, 1847 წელს ააშენეს.

თუმცა, ზოგიერთი სხვა სომხური წყარო ამტკიცებს, რომ ეკლესია აშენდა 1818 წელს.

მას შემდეგ, რაც აზერბაიჯანმა აიღო კონტროლი შუშაზე, 2020 წლის ომის დროს, ფაქტების შემმოწმებელი სომხური პლატფორმა Fip, აზერბაიჯანულ სოციალურ მედიაში გამოქვეყნებულ კადრებზე დაყრდნობით, აცხადებდა, რომ ეკლესიის გუმბათი და სამრეკლო "თითქმის მთლიანად დაინგრა."

Fip-ი წერდა, რომ ეს იყო ქალაქის ორი მოქმედი ეკლესიიდან ერთ-ერთი.

ბაქომ ასევე თქვა, რომ აღადგენს ღაზანჩეცოცის საკათედრო ტაძარს, შუშაში მდებარე მეორე ეკლესიას, მისი პირვანდელი სახით, რაც, ერევნის მტკიცებით, არის ვანდალიზმი, რომელიც "მიზნად ისახავს შუშის საკათედრო ტაძრისთვის სომხური იდენტობის წართმევას".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.

OC Media-ს რედაქცია ამჯობინებს, არ გამოიყენოს ისეთი ტერმინები, როგორიცაა "დე ფაქტო", "არაღიარებული" ან "ნაწილობრივ აღიარებული", როდესაც სტატია ეხება ოკუპირებულ აფხაზეთს ან ე.წ. სამხრეთ ოსეთს, ასევე, მთიან ყარაბაღს. ეს არ ასახავს რედაქციის პოზიციას მათ სტატუსთან დაკავშირებით.