საქართველომ უნდა გააუქმოს ოკუპირებული ტერიტორიების შესახებ კანონი და ხელი მოაწეროს ძალის გამოუყენებლობის შესახებ შეთანხმებას აფხაზეთთან და სამხრეთ ოსეთთან. ამის შესახებ TASS-ს ოკუპირებული აფხაზეთის ახალმა საგარეო საქმეთა მინისტრმა, ოლეგ ბარციცმა განუცხადა.

"საქართველოს ხელმძღვანელობის განცხადებები იმის შესახებ, რომ მათ სურთ ურთიერთობების გაუმჯობესება მთავარ მეზობლებთან — აფხაზეთთან, სამხრეთ ოსეთთან და რუსეთის ფედერაციასთან — ჩვენთვის შეუმჩნეველი არ რჩება, თუმცა ამავდროულად საჭიროა პრაქტიკული დადასტურებები და რეალური ნაბიჯები. ჩემი აზრით, ეს რამდენიმე ნაბიჯი შეიძლება გადაიდგას — მათ შორის ოკუპირებული ტერიტორიების შესახებ კანონის გაუქმება, რომელიც ვერანაირ კრიტიკას, ვერანაირ დროს ვერ უძლებს. უნდა ვიცოდეთ ის რეალობები, რომელშიც დღეს ვიმყოფებით. მეორე — ეს ძალიან მნიშვნელოვანია და ამაზე გავამახვილებთ ჟენევის ფორმატში ჩვენი ყველა კოლეგის ყურადღებას — არის სამხედრო ძალის გამოყენებაზე უარის თქმის შესახებ შეთანხმების ხელმოწერა. ამის შემდეგ შეგვიძლია სხვა რამეზე ვისაუბროთ", — განაცხადა ოკუპირებული აფხაზეთის საგარეო საქმეთა სამინისტროს ხელმძღვანელმა.