სოციალური სამართლიანობის ცენტრის (SJC) განცხადებით, მოსამართლე თამარ მჭედლიშვილი, რომელიც აქციების გამო დაკავებული 8 პირის — ზვიად ცეცხლაძის, ვეფხია კასრაძის, ვასილ კაძელაშვილის, გიორგი გორგაძის, ირაკლი მიმინოშვილის, ინსაფ ალიევის, თორნიკე გოშაძის და ნიკოლოზ ჯავახიშვილის საქმეს განიხილავს, დაკავშირებულია ე.წ. "კლანის" წევრებთან. მათ შორის, ლევან მურუსიძესთან და ამ უკანასკნელის ცოლის, ლელა ჭანიას ახლო მეგობარია.

"ხვალ, 23 აპრილს, თბილისის საქალაქო სასამართლოში გაიმართება აქციების გამო დაკავებული 8 პირის — ზვიად ცეცხლაძის, ვეფხია კასრაძის, ვასილ კაძელაშვილის, გიორგი გორგაძის, ირაკლი მიმინოშვილის, ინსაფ ალიევის, თორნიკე გოშაძის და ნიკოლოზ ჯავახიშვილის — საქმის მორიგი სასამართლო პროცესი. საქმეს მოსამართლე თამარ მჭედლიშვილი განიხილავს.

მჭედლიშვილი დაკავშირებულია ე.წ. "კლანის" წევრებთან — მათ შორის, ლევან მურუსიძესთან და ამ უკანასკნელის ცოლის, ლელა ჭანიას, ახლო მეგობარია.

მჭედლიშვილი სასამართლო სისტემაშია 2001 წლიდან, 2005 წლიდან კი თბილისის საქალაქო სასამართლოში საქმიანობს, თუმცა მოსამართლედ 2021 წელს დაინიშნა.

2022 წლიდან მჭედლიშვილი თბილისის საქალაქო სასამართლოს საგამოძიებო და წინასასამართლო სხდომის კოლეგიის მოსამართლეა.
თამარ მჭედლიშვილი სანქცირებულია ლიეტუვის მიერ," — წერს SJC.

შეგახსენებთ, 3 მარტს ესტონეთის საგარეო საქმეთა სამინისტროს ვებგვერდზე საქართველოს 55 მოქალაქის სანქცირების შესახებ ინფორმაცია გამოქვეყნდა.

სანქცირებულ პირთა შორის არიან პროკურორები, მოსამართლეები, პოლიციელები და პარლამენტის წევრები, რომლითაც ესტონეთში შესვლა აეკრძალათ — მათ შორისაა თამარ მჭედლიშვილიც.