ჩეჩნეთის კულტურის სამინისტრომ გამოსცა განკარგულება, რომელიც კრძალავს ყველა მუსიკას, რომლის რიტმიც წუთში 80 დარტყმაზე ნელია და 116-ზე სწრაფია.

3 აპრილს ჩეჩნეთის კულტურის სამინისტრომ განაცხადა, რომ კულტურის მინისტრმა მუსა დადაევმა ჩეჩნეთის ლიდერის, რამზან კადიროვის სახელით, ეს შეზღუდვები გროზნოში, ჩეჩენ ხელოვანებს გააცნო.

"ამიერიდან, ყველა მუსიკალური, ვოკალური და ქორეოგრაფიული ნაწარმოები უნდა შეესაბამებოდეს რიტმს 80-დან 116 დარტყმამდე წუთში“, — განაცხადეს ჩეჩნეთის კულტურის სამინისტროში და აღნიშნეს, რომ ჩეჩნური მუსიკა უნდა შეესაბამებოდეს "ჩეჩნურ მენტალიტეტს".

დამატებითი დეტალები იმის შესახებ, თუ როგორ აღსრულდება კანონი, ცნობილი არ არის.

ბენ უილერმა, მუსიკათმცოდნემ და ლეიბლის Mountain of Tongues-ის თანადამფუძნებელმა, რომელიც კავკასიური მუსიკის შენარჩუნებას და პოპულარიზაციას ცდილობს, OC Media-ს განუცხადა, რომ გადაწყვეტილება მუსიკაში ტემპების შეზღუდვის შესახებ არის "გაურკვეველი" და "დაუსაბუთებელი".

"ვფიქრობ, ზოგადი ვარაუდი არის ის, რომ ეს წესი მიემართება იმ მუსიკისკენ, რომელიც ხელისუფლების მიერ აღიქმება "არაჩეჩნური“ მუსიკის ელემენტების შემცველად. მაგრამ, რაც განცხადებაშიც ვნახე, დადაევს მოჰყავს ის ფაქტიც, რომ ჩეჩნური მუსიკალური კულტურა არის "განსხვავებული ტემპებითა და მეთოდოლოგიით“.

უილერმა ასევე თქვა, რომ ახალმა შეზღუდვებმა შეიძლება გავლენა მოახდინოს ხალხურ მუსიკასა და რელიგიურ ზიქრზე — ისლამური ლოცვის სუფიურ ფორმაზე, რომელშიც ფრაზები ან ლოცვები მეორდება ფეხის რიტმული დარტყმით, ტაშით, ან სუნთქვით.

"ჩეჩნური ხალხური მუსიკის კანონი, განსაკუთრებით გვიან საბჭოთა პერიოდში ჩაწერილი მასალები, შეიცავს ვირტუოზული აკორდეონის ნაწარმოებების მრავალფეროვნებას, რომლებიც შესრულებულია სწრაფი ტემპებით, რაც ბევრად აღემატება 116 დარტყმას წუთში", — განუცხადა უილერმა OC Media-ს.

"ამის გარდა კიდევ უამრავი მაგალითია, მათ შორის, ისეთი რელიგიური პრაქტიკა, როგორიც არის ჩეჩენი სუფიების მიერ შესრულებული ზიქრი, რომელიც წარმოადგენს ჩეჩნური კულტურის არამატერიალურ ასპექტებს, ეს ამ ახალი წესის უხეში დარღვევა იქნება".

უილერმა ასევე გამოთქვა შეშფოთება იმის შესახებ, რომ დასავლურმა მედიამ, შესაძლოა, ახალი შეზღუდვები იუმორისტულად, ან — ისლამური ტრადიციებიდან გამომდინარე გადაწყვეტილებად აღიქვას.

"ჩეჩნეთში არსებობს რელიგიური რწმენის ხმოვანი გამოხატვის ძირძველი და მდიდარი ტრადიცია, რომელიც ამ რეგულაციამ ასევე შეიძლება შეზღუდოს", — თქვა მან. "ასე რომ, ამის მიზეზები და ნეგატიური ზეგავლენა, რომელიც მას ექნება მუსიკოსებსა და ჩეჩნურ კულტურაზე, გაცილებით რთული და მზაკვრული ჩანს, როგორც ამას ავრცელებენ".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.