შინაგან საქმეთა სამინისტროს განსაკუთრებულ დავალებათა დეპარტამენტის ოპერატიული დაგეგმვის სამმართველოს ყოფილი უფროსი ირაკლი შაიშმელაშვილი ტვ პირველის კორესპონდენტთან საუბრისას აცხადებს, რომ საოკუპაციო ხაზზე მოწინააღმდეგე მხარე "დოზორის" და "ფოკუს დე"-ს სისტემებს იყენებს, რომლითაც 15-30 კმ-ზე აკონტროლებენ საოკუპაციო ხაზს. მისი თქმით, ამერიკას გადმოცემული აქვს საქართველოსთვის ეს სათვალთვალო სისტემები, მაგრამ ქართული მხარე არ იყენებს, რადგან "სჭირდებათ იყოს მეტი მკვდარი სივრცე" და ამ "მკვდარ სივრცეებს" კონტრაბანდისთვის იყენებენ.

"მოწინააღმდეგეს, იქითა მხარეს "დოზორის" და "ფოკუს დე"-ს სისტემის სათვალთვალო მოწყობილობები უყენიათ. ეს ნიშნავს, რომ 15-30 კმ-ზე აკონტროლებენ [საოკუპაციო ხაზს]. მაგალითად, საკორინთლოსთან რომ „დოზორის“ სისტემა უყენიათ, მთლიანად მაგისტრალს აკონტროლებენ, ანუ შეუძლიათ ავტომობილში ვინ ზის ის გაარჩიონ, არა თუ მანქანების სანომრე ნიშნები. და ჩვენ რატომ არ შეგვიძლია ამის დამონტაჟება და გამოყენება რათა მოვახდინოთ კონტროლი საოკუპაციო ხაზზე მიმდინარე პროცესების? არ იყენებენ, ერთის მხრივ, იმიტომ, რომ არ უნდათ რომ იქ არსებობდეს კამერები, სათვალთვალო სისტემები, ხედვის მაღალი გარჩევადობის საშუალებები. არ სჭირდებათ ალბათ იმიტომ, რომ სჭირდებათ იყოს მეტი მკვდარი სივრცე. მეორე მხრივ, ეს რომ არსებობდეს, დააკვირდებიან მოწინააღმდეგის აქტივობას. როცა ღამდება, ჩვენები უყურებენ მანქანის შუქებს, რომლებიც გადაადგილდებიან", — აცხადებს ირაკლი შაიშმელაშვილი.

შაიშმელაშვილის ინფორმაციით, ამერიკას გადმოცემული აქვს საქართველოს სათვალთვალო სისტემები, მაგრამ ეს სისტემები არ არის გამოყენებული. მისი თქმით, ეს მიზანმიმართულად ხდება, რადგან ოცნების ხელისუფლებას არ უნდა, რომ საოკუპაციო ხაზი ამ სისტემებით გააკონტროლოს.

"კონტრაბანდა გამოვლენილი თუ არის დასავლეთში, აფხაზეთის საოკუპაციო ხაზზე, აღმოსავლეთით, ცხინვალის საოკუპაციო ხაზზე, მე რაც სამინისტროში ვმუშაობდი, არც ერთი ფაქტი არ ყოფილა გამოვლენილი. როგორ ფიქრობთ, არ არის? ჩადით გორში და ნებისმიერ კონტრაბანდულ საშუალებას იყიდით, დაწყებული სიგარეტით, დამთავრებული შავი ხიზილალით. საიდან შემოდის ეს კონტრაბანდა? ეს აღჭურვილობაც გამოკვეთილ, წინასწარ შერჩეულ ადგილებზე უნდა ყოფილიყო. არ იყო იმ რაოდენობის, რომ მთელი საოკუპაციო ხაზი მოეცვა, მაგრამ კარგი ის არის, რომ ეს არის მობილური მართვის საშუალება და ნებისმიერ დროს შეიძლებოდა შეგეცვალა ლოკაცია და სხვა ადგილიდან გაგეგრძელებინა დაკვირვება", — ამბობს შაიშმელაშვილი ტვ პირველთან.

შსს-ს განსაკუთრებულ დავალებათა დეპარტამენტის ყოფილმა მაღალჩინოსანი, ირაკლი შაიშმელაშვილმა უწყება 2024 წლის დეკემბრის დასაწყისში დატოვა, 23 დეკემბერს კი ქვეყნიდან წავიდა. მედიაში გავრცელებული ინფორმაციით ირაკლი შაიშმელაშვილი აშშ-ში იმყოფება.