ჰარვარდის უნივერსიტეტმა ტრამპის ადმინისტრაციას მილიარდობით დოლარად შეფასებული ფედერალური გრანტების უკანონოდ გაყინვის გამო უჩივლა.

უნივერსიტეტის პრეზიდენტმა, ალან გარბერმა, ორშაბათს საჯარო წერილი გამოაქვეყნა, სადაც ამბობს, რომ $2 მილიარდიანი დაფინანსების გაყინვა სერიოზულად შეაფერხებს კრიტიკულ სამეცნიერო კვლევებს, განსაკუთრებით ბავშვთა სიმსივნის, ალცჰაიმერისა და პარკინსონის დაავადებების კვლევის მიმართულებას.

ტრამპმა საგანმანათლებლო დაწესებულებები გააკრიტიკა იმის გამო, რომ, მისი მტკიცებით, მათ ვერ შეძლეს ებრაელი სტუდენტების დაცვა ღაზაში მიმდინარე ომისა და აშშ-ის მიერ ისრაელის მხარდაჭერის საწინააღმდეგოდ გამართული პროტესტების დროს. ტრამპის ადმინისტრაციის მოთხოვნით, ჰარვარდს დაევალა მთავრობის მიერ დამტკიცებული გარე აუდიტების ჩატარება სასწავლო პროგრამებზე, ასევე პერსონალისა და სტუდენტების მიღების პროცესების გადაცემა მთავრობისათვის. უნივერსიტეტმა ოფიციალურად უარყო მოთხოვნები და განაცხადა, რომ ეს წარმოადგენს "ფედერალური მთავრობის ძალადობრივ ჩარევას აკადემიურ თავისუფლებაში".

დაფინანსება სხვა ელიტარულ უნივერსიტეტებსაც შეეზღუდათ. ამასთან, ანტისემიტიზმთან ბრძოლის სამუშაო ჯგუფმა, რომელიც ტრამპის ადმინისტრაციამ შექმნა, 60-ზე მეტი უნივერსიტეტის შემოწმება დაისახა მიზნად.

გარბერის თქმით, მთავრობის ქმედებები "სერიოზულ და ხანგრძლივ" შედეგებს გამოიწვევს. თავად გარბერი, რომელიც ებრაელია, აღიარებს, რომ ჰარვარდს ჰქონდა ანტისემიტიზმის შემთხვევები, თუმცა აცხადებს, რომ ამ პრობლემების აღმოსაფხვრელად უკვე შექმნილია სპეციალური სამუშაო ჯგუფები.

ტრამპის ადმინისტრაციამ ასევე გაუყინა $1 მილიარდიანი დაფინანსება კორნელის უნივერსიტეტს და $510 მილიონი — ბრაუნის უნივერსიტეტს. კოლუმბიის უნივერსიტეტმა, სადაც პალესტინის მხარდამჭერი დემონსტრაციები განსაკუთრებით აქტიურად იმართება, ტრამპის ადმინისტრაციას გარკვეულ მოთხოვნებზე დათანხმდა მას შემდეგ, რაც $400 მილიონიანი დაფინანსების დაკარგვის საშიშროება რეალური გახდა.

აშშ-ს ყოფილი პრეზიდენტი ბარაკ ობამა, რომელიც ჰარვარდის კურსდამთავრებულია, უნივერსიტეტს მხარს უჭერს და დაფინანსების გაყინვას უკანონოს უწოდებს.

თეთრი სახლის ოფიციალური განცხადება გასულ ორშაბათს გამოქვეყნდა: "ფედერალური დახმარების მდიდრული ნაკადი, რომელიც გადასახადის გადამხდელთა ფულით ამდიდრებს ბიუროკრატებს, სრულდება. ეს პრივილეგიაა და ჰარვარდი ამ სტანდარტებს ვერ აკმაყოფილებს."

ჰარვარდის სარჩელში ნათქვამია, რომ დაფინანსების გაუქმება არღვევს უნივერსიტეტის კონსტიტუციურ უფლებებს და წარმოადგენს ბერკეტს, რათა მთავრობამ აკადემიური გადაწყვეტილებების კონტროლი მოიპოვოს.

დამატებით, ჰარვარდის უნივერსიტეტისთვის ტრამპის ადმინისტრაცია კიდევ $1 მილიარდიანი დაფინანსების შეჩერებას აპირებს. ჰარვარდი მთავრობისგან წლიურად დაახლოებით $9 მილიარდს იღებს, რომელთაგან უმეტესობა სამეცნიერო კვლევებზე იხარჯება. რისკის ქვეშაა უნივერსიტეტის საგადასახადო შეღავათები და საერთაშორისო სტუდენტების მიღების შესაძლებლობაც.