მოკლედ: რუსულმა ავიაკომპანია აზიმუტმა პირდაპირი ფრენები დაიწყო სანქტ-პეტერბურგიდან თბილისის მიმართულებით. ინფორმაცია ავიაკომპანიის ოფიციალურ ვებგვერდზე გამოქვეყნდა.

  • ფრენები 2024 წლის 31 მარტიდან დაიწყო და რუსული ავიაკომპანია პირდაპირ რეისს კვირაში ორჯერ შეასრულებს — ოთხშაბათს და კვირას.

  • კომპანია აცხადებს, რომ თბილისში მომავალი პირველი მგზავრი სერტიფიკატით დააჯილდოვა.

  • რეისის პირველი მგზავრი მარია კალუგინა იყო, რომელიც, ავიაკომპანიის ცნობით, აპირებს, დასვენების დღეები საქართველოში გაატაროს.

ფოტო: azimuth.ru

მათ ასევე სერტიფიკატი გადასცეს ახალი რეისით მოსარგებლე პირველ მგზავრს თბილისიდან სანქტ-პეტერბურგისკენ, ანა რომანოვას.

ფოტო: აზიმუტის პირველი მგზავრი თბილისი-პეტერბურგის პირდაპირ რეისზე

რა ვიცით აზიმუტის შესახებ: ეს კერძო ავიაკომპანიაა, მჭიდრო ურთიერთობებით რუსეთის მთავრობასთან, კონკრეტულად, თავდაცვის სექტორთან.

აზიმუტს, ვებგვერდზე საქართველოს ოკუპირებული ტერიტორიები ცალკე სახელმწიფოებად ჰქონდა მონიშნული, კრიტიკის შემდეგ კი წაშალა.

ფოტო: სქრინი არქივიდან — აზიმუტს საქართველოს ოკუპირებული ტერიტორიები ცალკე სახელმწიფოებად ჰქონდა მონიშნული

  • სანქცირებულია უკრაინაში, რუსეთის მიერ დაწყებული სრულმასშტაბიანი ომის შემდეგ.
  • აზიმუტის ერთ-ერთი თანადამფუძნებელი, ვიტალი ვანცევი, ასევე სანქცირებულია უკრაინის მიერ.

ვანცევი უკრაინაში ომის დაწყების შემდეგ, 2023 წლის 9 თებერვალს, რუსეთის პრეზიდენტმა, ვლადიმერ პუტინმა, ალექსანდრე ნევსკის ორდენით დააჯილდოვა — ის რუსეთის ერთ-ერთი დიდი, ვნუკოვოს საერთაშორისო აეროპორტის გამგეობის თავმჯდომარეცაა.

ბოლო ხაზი: 2023 წლის ნოემბერში ცნობილი გახდა, რომ თბილისსა და სანქტ-პეტერბურგს შორის ფრენებს იწყებდა ქართული ავიაკომპანია Georgian Airways.