მოკლედ: პროკურატურის ინფორმაციით, ბრალდება წარედგინა 2 პირს, რომლებიც ე.წ. ქოლ-ცენტრის მეშვეობით, დიდი ოდენობით თანხებს მოტყუებით დაეუფლნენ.

დეტალები: ფინანსთა სამინისტროს საგამოძიებო სამსახურმა დაადგინა, რომ ორგანიზებული ჯგუფის წევრებმა ქოლ-ცენტრი ჩამოაყალიბეს და მისი ფუნქციონირებისთვის ელექტრონული სავაჭრო პლატფორმა შექმნეს.

  • ჯგუფის წევრები გამოგონილი სახელებით უცხო ქვეყნის მოქალაქეებს უკავშირდებოდნენ, მათი ნდობის მოპოვების შემდეგ, მოგების სანაცვლოდ, მოქალაქეებს ფულადი თანხების ინვესტირებას სთავაზობდნენ, რასაც შემდეგ თაღლითურად ეუფლებოდნენ.

ბრალდებულები ავსტრალიის მოქალაქის კრისტოფერ ფლამინის კუთვნილ 340 000 ლარზე მეტი ოდენობის თანხას თაღლითურად დაეუფლნენ.

  • ფლამინმა მათ ჩაურიცხა 33 600 ავსტრალიური დოლარი, 37 959 ავსტრალიური დოლარის ღირებულების ბიტკოინი და 96 179 ავსტრალიური დოლარის ღირებულების ეთერეუმი.

ბოლო ხაზი: დაკავებულებს ბრალდება წარედგინათ მუხლით, რომელიც ორგანიზებული ჯგუფის მიერ, მართლსაწინააღმდეგო მისაკუთრების მიზნით, სხვისი დიდი ოდენობით თანხის მოტყუებით დაუფლებას გულისხმობს.

ბრალდება 7-დან 10-წლამდე პატიმრობას ითვალისწინებს.