როგორც ჩანს, ჰარი პოტერით აღფრთოვანება საგის მსახიობებსაც კი მობეზრდათ. ცოტა ხნის წინ მირიამ მარგოლიზმა აღნიშნა, რომ მისი აზრით, ეს ჯადოსნური სერია მხოლოდ ბავშვებისთვისაა. თავად მარგოლიზი ჰარი პოტერის ფილმებში პროფესორი სპრაუტის როლს ასრულებდა.

ეს კომენტარი საგის ერთგულმა გულშემატკივრებმა, რბილად რომ ვთქვათ, მშვიდად სულაც არ მიიღეს, რის გამოც მსახიობს ახსნა-განმარტება კიდევ ერთხელ მოუწია. ინტერვიუში ფანების გულის მოსაგებად მარგოლიზმა დაამატა, რომ ჰარი პოტერის ფილმები შესანიშნავია და მადლიერია, რომ მათი ნაწილი იყო.

"საქმე ის არაა, რომ ჰარი პოტერი არ მიყვარს, ეს საოცარი სერიაა და ვამაყობ, რომ მისი ნაწილი ვარ, უბრალოდ, მიმაჩნია, რომ ის ბავშვებისთვისაა. დროა, მისმა გულშემატკივრებმა ცხოვრება გააგრძელონ, ეს 25 წლის წინ იყო, გაიზარდეთ!" — აღნიშნავს მსახიობი.

მარგოლიზმა ბოლოს ვეღარ მოითმინა და საგის მოყვარულებს ჰარი პოტერის ნაცვლად, ჩარლზ დიკენსის წიგნების წაკითხვაც კი ურჩია. პირველ ინტერვიუში მან ამ თემაზე არაერთი მწარე კომენტარი გააკეთა.

"ჰარი პოტერის ფანებზე ვდარდობ. წესით, სერიასთან ურთიერთობა უკვე დასრულებული უნდა ჰქონდეთ. ეს ხომ 25 წლის წინ იყო და თან ბავშვებისთვისაა. ისინი [ფანები] კი იქ ჩარჩნენ. ზოგჯერ ხალხისგან მესმის, ჰარი პოტერის თემატიკის ქორწილი გვაქვსო და ვფიქრობ ხოლმე, ღმერთო, ნეტავ პირველი ღამე რანაირი ექნებათ-მეთქი. ვერც კი წარმომიდგენია", — განაცხადა მსახიობმა ინტერვიუში.

ჰარი პოტერი მსოფლიოში ერთ-ერთი ყველაზე პოპულარული წიგნებისა და ფილმების საგაა. ის 87 ენაზეა თარგმნილი და მსოფლიოში 600 მილიონზე მეტ ეგზემპლარია გაყიდული. სერიის მიხედვით გადაღებული ფილმების შემოსავალმა ჯამში $7,7 მილიარდს გადააჭარბა.

ამჟამად კინოსტუდია Warner Bros. საგის მიხედვით სერიალზე მუშაობს. როგორც ვიცით, 7 სეზონად ჩაფიქრებული შოუს პრემიერა 2026 წელს უნდა შედგეს.

ნახე ჩვენი ყველა მასალა ჰარი პოტერზე.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...