მოკლედ: დემოკრატიის კვლევის ინსტიტუტის (DRI) მიხედვით, პრორუსულმა, ჰომოფობიურმა და ძალადობრივმა პარტიამ, კონსერვატიულმა მოძრაობამ, 2024 წლის საპარლამენტო არჩევნებისთვის მზადება ერთი წლით ადრე, 2023 წლის ოქტომბერში დაიწყო.

რეგიონული შეხვედრები: DRI წერს, რომ კონსერვატიულმა მოძრაობამ არჩევნებისთვის მზადება რეგიონებში ვიზიტით დაიწყო, კონკრეტულად 2023 წლის ოქტომბერში ჩავიდა შვიდ ქალაქში — თელავში, გორში, ქუთაისში, რუსთავში, მცხეთაში, ბათუმსა და ზუგდიდში.

  • პირველი შეხვედრა თელავში, ვაჟა ფშაველას სახელობის სახელმწიფო პროფესიულ დრამატულ თეატრში ჩატარდა, რომელიც სახელმწიფო ბიუჯეტიდან ფინანსდება.
  • DRI-ის დაკვირვებით, 2024 წლის 18-24 თებერვლის პერიოდში, პრორუსულმა პარტიამ კახეთის რვა რეგიონულ ცენტრი შეხვედრები გამართა, ესენია: საგარეჯო, წნორი, თელავი, ახმეტა, გურჯაანი, ყვარელი, დედოფლისწყარო და ლაგოდეხი.

გაიგე მეტი: პაატა გულიაშვილი ადასტურებს, რომ თეატრი ალტ-ინფოს დაუთმო – პრორუსულ, ძალადობრივ მოძრაობას

ყოველდღიური შეხვედრები თბილისის ცენტრალურ ოფისში: 22 იანვარს, კონსერვატიულმა მოძრაობამ ფეისბუქზე გაავრცელა ინფორმაცია, რომ თბილისის ცენტრალურ ოფისში თანამოაზრეებთან ყოველდღიური შეხვედრები დაიწყო, შეხვედრები შაბათ-კვირასაც ტარდება.

  • ორგანიზაცია წერს, რომ 2024 წლის 22 იანვრიდან 22 თებერვლამდე, რადიკალურმა დაჯგუფებამ ცენტრალურ ოფისში სულ მცირე ექვსი შეხვედრა გამართა.
  • დაჯგუფების ერთ-ერთი ლიდერის შოთა მარტინენკოს განცხადებით, ხალხის მხრიდან დიდი ჩართულობა და ინტერესია: "იმდენად დიდი ინტერესია, რომ ჩვენი მიზანი, რომელიც თბილისში 10.000 კაცის მობილიზებას ისახავდა, გეგმაზე ადრე სრულდება".

რადიკალური დაჯგუფების ფინანსური მდგომარეობა: DRI-ის შეფასებით, ერთი შეხედვით, კონსერვატიულ მოძრაობას ფინანსური კრიზისი აქვს. მაგალითად, პარტიის ოფიციალურ იუთუბ გვერდზე, ერთ-ერთი ლიდერი ზურაბ მახარაძე ხალხს პარტიისა და ტელევიზიის დახმარებისკენ მოუწოდებს, მიუხედავად ამისა, "ჯგუფი აგრძელებს ინტენსიურ რეგიონულ ვიზიტებს და შეხვედრებს თბილისის ცენტრალურ ოფისში".

  • დემოკრატიის კვლევის ინსტიტუტი ვარაუდობს, რომ რადიკალური და ღიად პრორუსული დაჯგუფების კონსერვატიული მოძრაობაო/ალტ-ინფოს შემოსავალი, შესაძლოა, ბევრად მაღალი იყოს, ვიდრე ეს ღია წყაროებში ჩანს.

ქართული ოცნების და კონსერვატიული მოძრაობის ურთიერთობა: DRI-ის შეფასებით, მმართველი პარტია კონსერვატიული მოძრაობის ძალადობრივ რიტორიკას წლების განმავლობაში "ლოიალური დამოკიდებულებით ასაზრდოებდა".

  • DRI წერს, რომ თავად ბევრჯერ დაუწერიათ ალტ ინფოს და პარტია ქართული ოცნების ლიდერების მსგავს ან იდენტურ ანტილიბერალურ რიტორიკაზე, ხაზგასმით ლოიალურ დამოკიდებულებაზე ერთმანეთის მიმართ, უმოქმედობით წახალისებულ ძალადობაზე ან ხელისუფლების დემონსტრაციულ უარზე — გამოეძიებინა ღიად პრორუსული დაჯგუფების მიერ ორგანიზებული მასობრივი ძალადობის შემთხვევები.

მსგავსი: DRI ამბობს, რომ პრორუსული ჯგუფებისა და ქართული ოცნების რიტორიკა თანხვედრაშია

DRI-ის დაკვირვებით, მმართველი პარტიის და კონსერვატიული მოძრაობის რიტორიკა 2023 წლის ნოემბერში, საქართველოსთვის ევროკავშირის კანდიდატი ქვეყნის სტატუსის მინიჭების შემდეგ, შეიცვალა.

  • ულტრამემარჯვენე დაჯგუფებამ ხელისუფლების ღია კრიტიკა მხოლოდ რადიკალური დაჯგუფების ერთ-ერთი ლიდერის ბექა ვარდოსანიძის რამდენიმესაათიანი დაკითხვის შემდეგ დაიწყო.
  • DRI-ის შეფასებით, მიუხედავად რიტორიკის მკვეთრი ცვლილებისა, ამ ეტაპზე იმის მტკიცება, რომ ქართულმა ოცნებამ პრორუსული და ჰომოფობიური პარტია კონსერვატიული მოძრაობის პირდაპირი თუ ირიბი მხარდაჭერა შეწყვიტა, "ნაადრევი, უფრო მეტიც, შეუძლებელია".

გაიგე მეტი: DFRLab: პროკრემლისტური კამპანია საქართველოში "ანტიმაიდანურ" მოძრაობას აქეზებს