მოკლედ: ომის დაწყებიდან 2 წლის შემდეგ, უკრაინის პრეზიდენტმა პირობა დადო, რომ მისი ქვეყანა ომში გაიმარჯვებს.

• რუსეთი უკრაინაში 2022 წლის 24 თებერვალს შეიჭრა.

დეტალები: "ჩვენ არ დავუშვებთ უკრაინის დასრულებას“, — განაცხადა ვოლოდიმირ ზელენსკიმ კიევში, საზოგადოებისადმი მიმართვის დროს.

სოლიდარობის ნიშნად, მას დასავლელი ლიდერებიც შეუერთდნენ.

• ზელენსკიმ, ასევე, თქვა, რომ მიუხედავად იმისა, რომ "ყველა ნორმალურ ადამიანს სურს ომის დასრულება", თუმცა ეს შესაძლებელი იქნება მხოლოდ უკრაინის პირობებით.
• "ჩვენ ვიბრძვით ამისთვის. ვიბრძვით უკვე 730 დღეა. გავიმარჯვებთ და ეს იქნება ჩვენი ცხოვრების საუკეთესო დღე", — თქვა ზელენსკიმ.

ზელენსკისთან ერთად გუშინ, 24 თებერვალს კიევში იყვნენ იტალიის, ბელგიისა და კანადის ლიდერები, ასევე ევროკომისიის პრეზიდენტი ურსულა ფონ დერ ლაიენი.

• მათ ომში დაღუპულთა ხსოვნის მემორიალები გვირგვინებით შეამკეს.

უკრაინაში, ომის 2 წლისთავთან დაკავშირებით, არ ჩასულან აშშ-ის ოფიციალური პირები. გასულ წელს, კიევში ჯო ბაიდენი ჩავიდა.

• თუმცა, ზელენსკი 23 თებერვალს შეხვდა დემოკრატი სენატორების ჯგუფს, რომელსაც უმრავლესობის ლიდერი ჩაკ შუმერი ხელმძღვანელობდა. მისი თქმით, ეს იყო იმის ნიშანი, რომ ვაშინგტონი მხარს უჭერს უკრაინას.

ურსულა ფონ დერ ლაიენმა შეაქო უკრაინის ჯარი, რომელიც ქვეყანას ომის პირველივე დღიდან იცავს:

• "თქვენ შეძელით, შეგეჩერებინათ რუსეთის თავდასხმა უკრაინის შუაგულში. თქვენ გადაარჩინეთ ქვეყანა, გადაარჩინეთ მთელი ევროპა", — თქვა მან.
• იტალიამ და კანადამ, ომიდან 2 წლის აღსანიშნავ ღონისძიებაზე განაცხადეს, რომ კიევთან უსაფრთხოების ორმხრივ შეთანხმებებს მოწერეს ხელი, რომლებიც მიზნად ისახავს უკრაინის დაახლოებას ნატოს სამხედრო ალიანსის წევრობასთან.
• მოგვიანებით, დიდი შვიდეულის წევრებმა — მათ შორის, კანადამ, იტალიამ, დიდმა ბრიტანეთმა და აშშ-მა, ონლაინ შეხვედრაზე უკრაინისთვის მხარდაჭერის პირობა დადეს და რუსეთის წინააღმდეგ ახალ სანქციებზე შეთანხმდნენ.

ასევე, ნახეთ: როგორ ცდილობს რუსეთი დაგაჯეროთ, რომ უკრაინას "ათავისუფლებს"

24 თებერვალი ევროპაში: უკრაინის მიმართ სოლიდარობის ნიშნად, ევროპის მასშტაბით, მათ შორის — საქართველოშიც, მსვლელობებიც გაიმართა.

• მონაწილეები რუსეთის პრეზიდენტ ვლადიმირ პუტინისგან ომის დასრულებას მოითხოვდნენ.

გავრცელებული ინფორმაციით, სულ მცირე ოთხი ადამიანი დააკავეს მოსკოვში გუშინ, 24 თებერვალს, ომის წინააღმდეგ გამართულ საპროტესტო აქციაზე, რომელიც ორგანიზებული იყო ჯარისკაცების ცოლების მიერ.

• ასეთი დემონსტრაციები რუსეთში ძალიან იშვიათია, რადგან ქვეყანაში მოქმედებს რამდენიმე კანონი, რომელიც სჯის განსხვავებული აზრის ქონას.

მსგავსი: პუტინზე მეტი რეპრესირებული მხოლოდ სტალინს ჰყავდა — "პროექტი"

ვითარება ფრონტის ხაზზე, ომის დაწყებიდან 2 წლის შემდეგ: უკრაინა ამ დღეს მძიმე მდგომარეობაში შეხვდა. ერთი კვირის წინ განაცხადეს, რომ ჯარები გამოიყვანეს ქალაქ ავდიივკადან.

• დიდი მარცხი იყო, ასევე, უკრაინის კონტრშეტევის წარუმატებლობა და აშშ-ის მიერ ფინანსური დახმარების საკითხში პრობლემებიც.

ბრძოლა ქვეყნის გასათავისუფლებლად გრძელდება. სულ მცირე, ოთხი ადამიანი დაიღუპა უკრაინის ქალაქებზე რუსეთის ბოლო თავდასხმების დროს.

• კიევმა განაცხადა, რომ შაბათს დილით დრონებით დაარტყა რუსეთის ერთ-ერთ უმსხვილეს ფოლადის ქარხანას.
• უკრაინას ომში გარკვეული წარმატებებიც აქვს — ჩაძირა რუსული ხომალდები და ჩამოაგდო ჯაშუშური თვითმფრინავები, თუმცა, როგორც BBC წერს, პრეზიდენტი ზელენსკის მიერ დაპირებული გამარჯვება ჯერ კიდევ შორს ჩანს.