აპრილში რომ ტეილორ სვიფტის ახალი ალბომი გამოდის, გაიგე უკვე? ალბათ არა, თუკი გასულ კვირას აქტიურად არ ადევნებდი თვალს კულტურისა და პოპკულტურის ცხელ-ცხელ ამბებს. ამ კვირაში კი კიდევ ბევრი საინტერესო რამ მოხდა: თვალი შევავლეთ მომავალი ფილმებისა და სერიალების ცინცხალ ტრეილერებსა და პირველ კადრებს. მოკლედ, მიმდინარე ინტერნეტგანხილვებს რომ არ ჩამორჩე, ტრადიციულად, ერთ სტატიად შეგიჯამეთ ბოლო კვირა.

1. გრემი 2024-ის გამარჯვებულები დასახელდნენ

თბილისის დროით 5 თებერვალს, გრემის დაჯილდოების ცერემონია გაიმართა. ყველაზე პრესტიჟულ ამერიკულ მუსიკალურ დაჯილდოებაზე ნომინაციების რაოდენობით წელს SZA, ტეილორ სვიფტი, Boygenius, ოლივია როდრიგო და მაილი საირუსი ლიდერობდნენ. ტეილორ სვიფტმა საუკეთესო ალბომის კატეგორიაში გრემი მეოთხედ მიიღო. ცერემონიაზე გამოჩნდა სელინ დიონიც, რამაც ყველა გაახარა.

გრემის გამარჯვებულებისა და ნომინანტების სრული სია ნახე აქ.

2. ტეილორ სვიფტმა ახალი ალბომიც დააანონსა

გრემის დაჯილდოების ცერემონიაზევე დააანონსა ახალი ალბომი ტეილორ სვიფტმა. მუსიკოსის რიგით მე-11 სტუდიური ალბომი, სახელწოდებით The Tortured Poets Department, 19 აპრილს გამოვა. სვიფტმა გაამხილა სიმღერების ჩამონათვალი და ალბომში შემავალი კოლაბორაციებიც.

უფრო ვრცლად წაიკითხე აქ.

3. მეფე ჩარლზ III-ს სიმსივნის დიაგნოზი დაუსვეს

ბუკინგემის სასახლემ გაავრცელა ინფორმაცია იმის შესახებ, რომ გაერთიანებული სამეფოს მეფეს, ჩარლზ III-ს, სიმსივნე დაუდგინდა. განცხადების მიხედვით, მეფემ მკურნალობა უკვე დაიწყო, რის გამოც გარკვეული პერიოდის განმავლობაში საჯარო ვალდებულებების შესრულებას ვეღარ შეძლებს. სასახლის განცხადებაში არ არის დაკონკრეტებული, მონარქს რა ტიპის და რომელი სტადიის სიმსივნე დაუდგინეს.

უფრო ვრცლად წაიკითხე აქ.

4. ჯიფსი როუზის შესახებ ახალი სერიალის გადაღება დაანონსდა

ჯიფსი როუზ ბლანჩარდი, ოჯახში ძალადობის მსხვერპლი ამერიკელი ქალი, რომელიც საკუთარი დედის მკვლელობისთვის იხდიდა სასჯელს, დეკემბერში ვადაზე ადრე გაათავისუფლეს. ცოტა ხნის წინ გამოვიდა დოკუმენტური სერიალი ჯიფსი როუზ ბლანჩარდის აღიარებები საპატიმროში (The Prison Confessions of Gypsy Rose Blanchard); მალევე კი ახალ სერიალსაც ვიხილავთ, რომელიც უკვე გათავისუფლებული ქალის ცხოვრებას ასახავს.

უფრო ვრცლად წაიკითხე აქ.

5. იურული სამყარო 4-ის გამოსვლის თარიღი გახდა ცნობილი

ტრილოგიად ჩაფიქრებულ ფილმების სერიას მომავალ წელს კიდევ ერთი ნაწილი შეემატება. კინოსტუდია Universal-სა და რეჟისორ დევიდ ლიჩს შორის მოლაპარაკებები მიმდინარეობს იურული სამყარო 4-ის გადასაღებად. ფილმის სცენარის ავტორი დევიდ კეპი იქნება, რომელსაც წინათ ფრენჩაიზის პირველ ორ ნაწილზე (იურული პარკი და დაკარგული სამყარო: იურული პარკი) უმუშავია. პროექტის აღმასრულებელი პროდიუსერის როლს კი სტივენ სპილბერგი მოირგებს.

უფრო ვრცლად წაიკითხე აქ.

6. მოანა 2-ის გამოსვლის თარიღიც გავიგეთ

დისნეი ცნობილი ანიმაციური ფილმის, მოანას, გაგრძელებას ამ წელს გამოუშვებს. კომპანიამ ფილმის გამოსვლის თარიღი დააანონსა. თავდაპირველად იგეგმებოდა, რომ მოანა 2 სერიალი ყოფილიყო, თუმცა, დისნეის დირექტორმა ბობ იგერმა კადრების ნახვის შემდეგ აღფრთოვანებით გადაწყვიტა, რომ ფილმის გაგრძელება აჯობებდა.

უფრო ვრცლად წაიკითხე აქ.

7. გავრცელდა პირველი კადრები ბნელი მატერიის ეკრანიზაციიდან

Apple TV+-ზე მალე ახალი საი-ფაი თრილერი გამოჩნდება. ბნელი მატერია ამერიკელი მწერლის, ბლეიკ კრაუჩის, ამავე სახელწოდების ბესტსელერი რომანის ეკრანიზაციაა, რომელიც ჯამში 9 სერიას მოიცავს. სერიალის პრემიერა მაისში შედგება.

ნახე სხვა კადრები აქ.

8. Inside Out 2-ის კიდევ ერთი ტრეილერი გამოვიდა

როგორც ჩანს, ანიმაციის ახალი პერსონაჟი მოსვენებას არც მაყურებლებს არ მოგვცემს. Inside Out 2-ს ზაფხულში ვიხილავთ, ანიმაციაში კი კარგად ნაცნობი გმირების გარდა ახალ ემოციას, შფოთვას, გავიცნობთ.

ნახე ტრეილერი აქ.

9. გამოვიდა ტრეილერი ახალი სერიალისა, სადაც ქეით უინსლეტი დიქტატორის როლში გვევლინება

Succession-ის შემქმნელებისგან მალე ახალ მინისერიალს ვიხილავთ, რომელშიც მთავარ როლს ქეით უინსლეტი ასრულებს. ახალი სერიალი, სახელად The Regime, გამოგონილი ევროპული ქვეყნის კანცლერზე გვიყვება, რომელიც ქვეყანაში ავტორიტარულ რეჟიმს ამყარებს. კანცლერის როლში კი სწორედ ქეით უინსლეტს ვიხილავთ.

ნახე ტრეილერი აქ.

10. პაპმა ფრანცისკემ გეი წყვილების დალოცვის მოწინააღმდეგეებს უპასუხა

"არავინ აღშფოთდებოდა, ის ბიზნესმენი რომ დამელოცა, რომელიც ალბათ ხალხის ექსპლუატაციას ეწევა. ეს კი საშინელი ცოდვაა", — აღნიშნა კათოლიკე ეკლესიის მეთაურმა ინტერვიუში, — "სამაგიეროდ, მაშინ არიან აღშფოთებულები, როცა კურთხევას ჰომოსექსუალს ვაძლევ. ეს ფარისევლობაა. ჩვენ, ყველამ, პატივი უნდა ვცეთ ერთმანეთს. ყველას. ამ გადაწყვეტილების საფუძველიც შეწყნარებაა".

უფრო ვრცლად წაიკითხე აქ.

ბონუსი: აისბერგზე ჩაძინებული პოლარული დათვის ფოტომ ინტერნეტი მოიცვა

ეს სურათი რეალურად ველური ბუნების ფოტოკონკურსში გამარჯვებული ნამუშევარია, რომლის ავტორიც მოყვარული ხელოვანი ნიმა სარიხანი გახლავთ.

ფოტოკონკურსის სხვა მონაწილეების ნამუშევრები ნახე აქ.