რა ხდება: ღაზის სექტორში, სამხრეთით მდებარე ქალაქ ხან-იუნისში, გაერო-ს მოსამზადებელ ცენტრზე თავდასხმის შედეგად, სულ მცირე 9 ადამიანი დაიღუპა, 75 კი დაშავდა.

• მოსამზადებელ ცენტრს დევნილები აფარებენ თავს.
• გაეროს დახმარებისა და სამუშაოების სააგენტოს (UNRWA) ინფორმაციით, თავშესაფარს ორი სატანკო ჭურვი ესროლეს.

დეტალები: გაერომ "ომის ძირითადი წესების აშკარა უგულებელყოფა" დაგმო.

• გაეროს მოსამზადებელი ცენტრი, UNRWA-ს ერთ-ერთი ყველაზე დიდი თავშესაფარია. მის ტერიტორიას თავს 30-დან 40 ათასამდე ადამიანი აფარებს.
• UNRWA-ს განცხადებით, ინფორმაცია მიაწოდეს ისრაელის ხელისუფლებასაც, რომ თავშესაფარი და ადამიანები, რომლებიც იქ აფარებენ თავს, საერთაშორისო სამართლის მიხედვით უნდა იყვნენ დაცული.
• UNRWA-ს ღაზის წარმომადგენლობის დირექტორი, თომას უაითი ამბობს, რომ შენობაში, რომელსაც ჭურვები მოხვდა, ღაზის ჩრდილოეთიდან გამოქცეული 800-მდე ადამიანი აფარებდა თავს.
• "ახლა მთავარი გამოწვევაა, ვცადოთ დაშავებულების სამედიცინო დახმარება, იმ სიტუაციის გათვალისწინებით, რომ ღაზის მთავარი საავადმყოფოები ლიმიტირებული შესაძლებლობებით მუშაობენ", — თქვა მან.
• უაითი, ასევე, აღნიშნავს, რომ UNRWA-ს წარმომადგენლები მუდმივ კონტაქტზე იყვნენ ისრაელელ სამხედრო პირებთან და მათ ჰქონდათ პირობა მიღებული, რომ თავშესაფარს საფრთხე არ დაემუქრებოდა.
• "ასე რომ, მიუხედავად მთელი ამ კოორდინაციისა, რეალობა ის არის, რომ ისრაელის არმია არ ასრულებს თავის ვალდებულებებს მშვიდობიანი მოსახლეობის დასაცავად, არ ავლენს სათანადო სიფრთხილეს იმ ადგილებში მოქმედებისას, სადაც მშვიდობიანი მოსახლეობაა", — ამბობს უაითი.

• UNRWA-ს განცხადებებს ისრაელის თავდაცვის ძალებში უპასუხეს — მათი თქმით, მდგომარეობის შესწავლის შემდეგ დაადგინეს, რომ ინციდენტის მიზეზი ისრაელის საჰაერო, ან საარტილერიო დარტყმა არ ყოფილა.
• მათივე თქმით, მიმდინარეობს უფრო ღრმა მოკვლევაც და IDF-ი, ასევე, განიხილავს შესაძლებლობას, რომ ეს ჰამასის მიერ გახსნილი ცეცხლი ყოფილიყო.
• აშშ-ის სახელმწიფო დეპარტამენტის პრესსპიკერის მოადგილემ, ვედანტ პატელმა განაცხადა, მშვიდობიანი მოსახლეობის დაცვა ღაზაში უმნიშვნელოვანესია.
• "ვგმობთ თავდასხმას გაეროს ხან-იუნისის მოსამზადებელ ცენტრზე", — თქვა მან და მომხდარს "უკიდურესად შემაშფოთებელი" უწოდა.

რა ვითარებაა ფრონტის ხაზზე: ისრაელის თავდაცვის ძალებს (IDF) ხან-იუნისი ალყაში ჰყავს მოქცეული.

• ინტენსიურად იბომბება ქალაქის ორი მთავარი საავადმყოფოს მიმდებარე ტერიტორია. ამ საავადმყოფოებში ათასობით პაციენტი და მედპერსონალია, მათ შენობების დატოვების საშუალება არ აქვთ.
• ისრაელმა ხან-იუნისის დასავლეთით მყოფ მოსახლეობას ევაკუაციისკენ მოუწოდა, საევაკუაციო ზონაშია ორი ყველაზე დიდი საავადმყოფო — ნასერი და ალ-ამალი.
• გაეროს ვარაუდით, საუბარია 88 ათას ადგილობრივ მაცხოვრებელსა და 425 ათას დევნილ ადამიანზე.
• უაითმა BBC-ს უთხრა, რომ კიდევ რამდენიმე ათეული ადამიანი ახლა ქალაქ რაფასკენ მიიწევს, რომელიც ეგვიპტეს ესაზღვრება.
• რაფას თავს ახლა 1.4 მლნ ადამიანი აფარებს.

ისრაელის თავდასხმების შედეგად, ომის დაწყებიდან დღემდე ღაზაში 25 700-ზე მეტი ადამიანი დაიღუპა.

კონფლიქტი მას შემდეგ დაიწყო, რაც, 7 ოქტომბერს, ისრაელის ტერიტორიაზე ჰამასის ტერორისტები შეიჭრნენ, მოკლეს, დაახლოებით 1300 ადამიანი, 250 კი — ტყვედ აიყვანეს.